媠氣台灣話「打扮 tánn-pān」(042)
遮欲紹介个，毋是「梳妝打扮 se-tsng tánn-pān」迄種意思个「打扮」，是特殊用法「共伊當做〇〇打扮」，這是共伊當做〇〇來對待个意思。
鄭溪泮先生台語小說《Chhut Sí-sòaⁿ》(1926) p.156:
「Lí tio̍h kín khì; nā bô, góa beh jīn lí chò chha̍t, lâi táⁿ-pān.」
（汝著緊去，若無，我欲認汝做賊來打扮。）
文例1：伊迄个部長老爸做主，政商聯姻，共伊娶一个無伊緣个千金小姐。一年過去，伊iáu是共小姐當做生柴打扮，煞尾離緣，閣著賠儂siáu-lé。
（I hit-ê pōo-tiúnn lāu-pē tsò-tsú, tsìng-siong liân-in, kā i tshuā tsi̍t-ê bô i iân ê tshian-kim-sió-tsiá. Tsi̍t-nî kuè--khì, i iáu sī kā sió-tsiá tòng-tsò tshinn-tshâ tánn-pān, suah-bué lī-iân, koh tio̍h puê lâng siáu-lé.）
註跤：「某儂共怹某當做生柴打扮」是套語，意思是翁無疼某，毋肯佮某仝房。「賠siáu-lé」，就是〔賠遮羞費〕。
文例2：即个統治集團，掠咱人民做奴隸打扮，軟土深掘，結果多數儂煞干焦會曉怨嘆家己無才調親像儂有十八pha通領。
（Tsit-ê thóng-tī tsi̍p-thuân, lia̍h lán jîn-bîn tsò lôo-lē tánn-pān, nńg-thôo tshim ku̍t, kiat-kó to-sòo lâng suah kan-ta ē-hiáu uàn-thàn ka-tī bô-tsâi-tiāu tshin-tshiūnn lâng ū tsa̍p-peh-pha thang niá.）
© 潘科元 2013 版權所有
Comments powered by Disqus.