欲用漢字寫台語是真歹紡[pháng]个代誌，定定毋知一个真平常个音義愛按怎寫，但是即篇毋是欲舉「台語有音，揣無字」个例，是欲比一个漢字看起來真簡單，但是佇台語文來唸真無簡單个例：「有孝」。
台語文「有孝」有三種唸法，兩種解說：
一、iú-hàu：兩字攏唸文言音，就是「孝順」个意思。
二、 ū-hàu：前字唸白話音，後字唸文言音，這佮頂面仝意思，嘛是「孝順」个意思，佇台語舊語料不時看著、聽著，但是現代台灣儂罕得按呢講矣，攏用第一種講法：「有」唸文言音 iú，可比出名流行歌「家後」有唱著。致使有儂將「有孝 iú-hàu」誤寫做「友孝」，毋著，原因是：
1. iú-hàu 是晚輩對長輩行孝，佮平輩之間「兄友弟恭」無仝倫理關係。iú-hàu 个對象攏是講「iú-hàu爸母」抑是直系尊親，一般無講「iú-hàu兄哥」。
2. 「孝」較重要，「友」其次，而且先有「爸囝」个關係，才有可能有「兄弟」个關係。所以文言文才攏講「孝友 hàu-iú」、「孝友傳家」。台語 iú-hàu 若寫做「友孝」，煞將「友」安蹛「孝」个頭頂，哪有天理？
2. iú-hàu / ū-hàu 兩種講法仝款，只有「有」--字才有可能有 iú / ū 兩種台語音，「友」無可能，這愛有聲韻學个智識才有法度理解。
因為有義理佮音韻三重个理由，所以寫「友孝」毋著，愛寫「有孝」。
三、ū-hà：兩字攏唸白話音，這是特別指「有喪孝[ū sng-hà] 在身、帶孝[tuà-hà]」。台語「孝」唸白話音 hà 个時，差不多攏佮喪事有關係；但是「孝」唸文言音 hàu 就無的確。
例句：「若是有孝佇咧，毋通去別儂兜行踏，這是民間个禁忌。」 （Nā sī ū-hà tī--leh, m̄-thang khì pa̍t-lâng-tau kiânn-ta̍h, tse sī bîn-kan ê kìm-khī.） 即句个「孝」愛唸 hà，袂用得唸普通慣勢唸个文言音 hàu
雖然漢字是中華民國个「國字」，但是就台語文立場來看，只是罔將就[bóng-tsiong-tsiū]來用，定著愛有音標个輔助，若無，連專家嘛定定愛脫箠[thut-tshuê]。這毋是台語本身个「問題」，是台語發展了傷豐沛[phong-phài]、幼路，致使漢字相對來講粗澀歹用。
但是現代生活所需要个應用，台語往往歹應付，這嘛毋是台語本身个「問題」，是長期予政府迫害、洗腦，台灣儂乖乖、戇戇，就按呢放捒母語个結果。
雖然台語是「無辜」个，咱猶原愛設法，予台語佇舊底个豐沛幼路个基礎頂面，發展現代台語佮台文。
Comments powered by Disqus.