媠氣台灣話「變相 piàn-siòng」(057)
解說：變相[piàn-siòng]，一个儂雄雄改變伊一向个行為習慣、個性、好惡[hònn-ònn]，佇古早儂个人生經驗中，儂咧變相，可能是欲死个兆頭[tiāu-thâu]。
即个詞，台日大辭典有收兩種講法，文言音是 piàn-siòng，白話音是 pìnn-siùnn，目今也有真濟儂文白濫講 pìnn-siàng（siàng 是漳腔文音）。
文例 1：怹公對待序細，自底真慈祥，迄暗煞對新婦囝孫仔歹聲嗽，逐項攏袂中意，敢是咧變相。
（In kong tuì-thāi sī-sè, tsū-té tsin tsû-siông, hit-àm suah tuì sin/sim-pū kiánn-sun-á pháinn siann-sàu, ta̍k-hāng lóng bē tìng-ì, kánn sī leh piàn-siòng.）
文例 2：怹翁自少年就歹囝浪蕩、開跋食𨑨，無所不至。舊年做一下改頭換面，歸心賣菜做生理。儂笑伊是咧變相，伊嘛無要緊。
（In ang tsū siàu-liân to̍h pháinn-kiánn-lōng-tōng, khai-pua̍h tsia̍h-thit, bû-sóo-put-tsì. Kū-nî tsò-tsi̍t-ē kái/ké-thâu uānn-bīn, kui-sim bē-tshài tsò sing-lí. Lâng tshiò i sī leh piàn-siòng, i mā bô iàu-kín.）
相關詞：反形[huán-hîng]、變款[pìnn-khuán]。
© 潘科元 2013 版權所有
Comments powered by Disqus.