媠氣台灣話「起磅、放磅、盡磅、超磅」(069)

媠氣台灣話「起磅、放磅、盡磅、超磅」(069) 作者：潘科元

一、單字「磅」做動詞，用磅仔稱重个意思。「磅」是 pound 个台語音譯，一字「磅」做動詞，加「仔」了後，講「磅仔」就是名詞，指一類稱重个家私，佮「秤仔 tshìn-á」形體無仝，用路差不多。

舊型个磅仔欲磅重个時，愛照物件大概个重量範圍，選用適當个「磅子 pōng-tsí」（類似華語〔砝碼〕）；較新型个磅仔靠糾線[kiù-suànn]个力學原理，免用磅子，物件囥頂懸，磅針即時自動踅到幾斤幾兩个所在。上新个電子磅仔，毋但重量，連價錢都會替咱算出來。

俗語「橐袋仔 袋磅子」[Lak-tē-á tē pōng-tsí]，是咧詼講有錢儂 橐袋仔 袋金銀財寶，若無錢儂愛風神只好袋磅子。

動詞「磅」本來是磅重，但是引申出去，用各種儀器來測量，攏有可能講「磅」，像講「磅看血壓偌懸？」、「磅看心臟跳偌緊？」（漢醫節脈講：「脈 幾至[me̍h# kuí tsì] ？」）。

水表、電表、gá-suh表等等，通稱「磅表 pōng-pió」。

二、「磅」名詞，有重量單位「英磅」个意思，引申做某種單位刻度个一gám，親像真濟電風个風力強度分做三磅：頭磅（一[it]磅）、二磅、三磅。有个牌子是設計做「頭磅」上強，有个是設計做「三磅」上強。

按呢，「磅」也表示車輛行進个速度，至少分做四種坎站：

1.「起磅 khí-pōng」：車輛、機械開始出力起行、運轉个意思，引申做活動熱烈開始。

例句(1)：鋸台欲起磅个時，儂著閃較邊--仔咧，較袂危險。

例句(2)：九合一選舉一下起磅，大街小巷逐工攏鬧熱滾滾。

台語「khí-pōng」另外有「男性器官勃起[pu̍t-khí]」个意思，這扑算是別條線路个引申，因為「pōng」另外有「雄雄脹大[tiòng-tuā]」个意思，漢字無一定仝字。

2.「放磅 pàng-pōng」：加速運轉个意思。

歌仔冊《出外風俗歌》（1932年捷發漢書部）有一葩（漢字有改）：

火車一時卜起行　水螺伊有陳一聲　車內下人巢知影　開車放傍着起行

以下共伊改做我个用字加標音，請注意原文「放傍」就是「放磅」。

火車一時欲起行 Hué-tshia tsi̍t-sî beh khí-kiânn
水螺伊有霆一聲 Tsuí-lê i ū tân tsi̍t-siann
車內个人齊知影 Tshia-lāi ê lâng tsâu/tsiâu tsai-iánn
開車放磅著起行 Khui-tshia pàng-pōng tio̍h khí-kiânn

（台語「開車」佮「駛車」無仝意思，開車是指預定个時刻一到，車開始起行出發。當今真濟儂放棄台語駛車个講法，學華語講「開車」表示「駕駛車輛」，佮咱儂本來所講个「開車」意思走縒去矣。）

3.「盡磅 tsīn-pōng」：放磅若無撙節，一直去就「放盡磅」。Oo-tóo-bái、自動車若催到「盡磅 tsīn-pōng」，就是油門催到底，予車達到極速[ki̍k-sok]，袂凍閣較緊，有時也指法律上个限速。

例句(1)：窒車 窒[that]足久，今袂窒矣，毋過放盡磅嘛袂赴開會矣。

引申用法，各種事物个程度弓[king]到上大、上強、達到盡頭，就是「盡磅」，包括人情世事。

例句(2)：我按呢照顧--伊 都[to]做到盡磅矣，無，是欲叫我閣按怎？

4. 「超磅 tshiau-pōng」：已經到「盡磅」iáu毋煞，閣硬弓落去，就會「超磅」。

載貨若載到「盡磅」，閣疊[thia̍p]起去就「超磅 tshiau-pōng」矣。流籠（電梯）若櫼[tsinn]傷濟儂入去，超磅个時就會 ki，門袂關、袂振動。一身儂派兩儂份个工予伊做，也會超磅。

以前我聽老師講「起磅」是「起動 khí-tōng」个音變，但是咱照以上所列，知影車个運動會用得分：「起磅、放磅、盡磅、超磅」，按呢一系列个動態，我看「起磅」毋是對「起動」變來个，是對「磅」即个詞素表示程度、速度个意思創造出來个系列用詞之一。

三、「磅」動詞，爆發、爆炸[po̍k-tsà]、爆破个意思，是擬聲動詞，早頭模仿爆炸个聲音所創造出來个話。

例句(1)：伊少年个時捌去九份仔扑磅空，挖塗炭。

「磅空」个字面意思是磅開了後所做成个空，就是指人工隧道[suī-tō]。

例句(2)：開路拄著山，用磅子[pōng-tsí]共伊磅予開，做磅空[pōng-khang]。

即个「磅子」毋是第一點所講个〔砝碼〕，是指炸藥。教育部用字無分，但是台日大辭典分寫做「磅子」（砝碼）佮「唪子」（炸藥）。

例句(3)：走高速公路，欲軁[nǹg]過磅空个時，著愛開大燈。

「軁」本是指身軀ànn低，行--過，抑是爬過啥乜物件，親像「軁過橋跤」、「軁過媽祖个轎跤求保庇」。「軁」用來講車輛，也真出神。

閣講一項。咱儂體內，有時難免會結石，引起病痛，以前往往著愛去開刀受苦。

目今醫學發達，除了用內視鏡 [luē-sī-kiànn] 將結石仔 夾[ngeh]出來，閣有一種神奇个「體外震波碎石術」[thé-guā tsín-pho tshuì-tsio̍h-su̍t]，用儀器對體外發出震動波[tsín-tōng-pho]，迵[thàng]入去到體內臟腑結石迄搭，共石頭仔磅予碎鹽鹽，遐个幼幼仔 經過幾日仔至幾禮拜久，就會沓沓仔綴小便排出去。

例句(4)：聽著老大儂咧開講：「有結石仔[kiat-tsio̍h-á]，去磅磅咧，過--幾工仔 放出來就好矣啦。」

台語 pōng 閣有別種意思、用法，先寫到遮。

相關詞：磅米芳[pōng-bí-phang]（華語〔爆米花〕）、磅魚仔（用炸藥共魚仔磅予死，惡質个掠魚法）。

© 潘科元 2014 版權所有．敬請賜教