媠氣台灣話「雖罔 sui-bóng」(064)

鋪出日 2013/12/21 更新日 2023/07/13

作者 潘科元

7 分鐘閱讀

解說：雖罔[sui-bóng]，連接詞，就是「雖然」个意思。即个詞，現時一般台灣儂罕得聽著，若是有長老教會背景个儂，就非常熟，怹佇教會內猶原時常咧用，因為白話字聖經、文獻，三不五時有用「雖罔」。

台語文佇最近二十幾年才漸漸興起，成做一款「運動」，台語文作者怹翻頭去讀古早个台語文獻，自然就會學著即个佮華語文無仝，台語才有个用詞，所以怹真愛寫佇作品內底。按呢往往引起初學个讀者真大个憢疑[giâu-gî]，毋知「雖罔」是啥，準做儂解說予伊聽，伊也無法度理解「雖罔」為啥乜就是「雖然」个意思。

其實真簡單，咱著愛聯想一句俗語：「老罔老，閣會哺[pōo]塗豆」（嘛有講「老罔老，閣會掰[pué]塗豆」），即个「罔」，毋是「罔飼、罔育[io]、罔度日」，迄種「罔」是「姑且將就、凊彩仔」个意思，但是「老罔老，閣會哺塗豆」，應該解說做「老，雖然老，但是閣會哺塗豆」。

布袋戲个腳數[kioh-siàu]內底，有一款囡仔，雖然少歲，但是武藝高強，伊个對手若恥笑伊傷細漢、無路用，囡仔掠話就應講：「細罔細，我个家私頭仔不時嘛尖lè-lè」（這算是孽話，因為有性暗示）。即个「罔」，也是「雖然」个意思。

所以，「雖罔」即个詞个結構是「同義複詞」，「罔」就是「雖」，「雖罔」个意思就是「雖然」。

文例 1：
雖罔儂誠忝，iáu-kú 熱心咧寫作「媠氣台灣話」系列个文章。

（Sui-bóng lâng tsiânn thiám, iáu-kú jia̍t-sim teh siá-tsok "Suí-khuì Tâi-uân-uē" hē-lia̍t ê bûn-tsiunn.）

註跤：「雖罔」囥佇前半句，配合後半句起頭个「iáu-kú」，嘛會使配合「猶原」、「嘛是」、「但是」等等。

文例 2：
雖罔撒旦將世間个財富攏排列佇伊个面前，伊也毋肯出賣家己个靈魂。

（Sui-bóng Sat-tàn tsiong sè-kan ê tsâi-hù lóng pâi-lia̍t tī i ê bīn-tsîng, i iā m̄-khíng tshut-bē ka-tī ê lîng-hûn.）

近義詞：雖然、雖是。