媠氣台灣話「ni-sinn」(043) 作者：潘科元

媠氣台灣話「ni-sinn」(043)

解說：形容食好物[mi̍h]个時，毋甘大喙食完，一屑[sut]仔一屑仔寬寬仔[khuann-khuann-á]享用，加強語氣講「ni-ni-sinn-sinn」。「ni-sinn」也指做代誌 愛拖沙，袂扭掠[liú-lia̍h]，袂輸毋甘傷早完成。

文例1：阮做囡仔个時，物資真乏，一半擺仔有四秀仔通食，攏嘛足ni-sinn，毋甘連鞭食完。

（Guán tsò gín-á ê sî, bu̍t-tsu tsin ha̍t, tsi̍t-puànn-pái-á ū sì-siù-á thang tsia̍h, lóng mā tsiok ni-sinn, m̄-kam liâm-mi tsia̍h uân.）

文例2：即塊囡仔古个背景，是講有一口灶儂 虯虯儉儉，食飯配菜真 ni-sinn，一塊鹹魚，欲予大儂囡仔度一頓。

（Tsit-tè gin-á-kóo ê puē-kíng, sī kóng ū tsi̍t kháu-tsàu lâng khiû-khiû-khiām-khiām, tsia̍h-pn̄g phuè-tshài tsin ni-sinn, tsi̍t-tè kiâm-hî, beh hōo tuā-lâng gín-á tōo tsi̍t-tǹg.）

文例3：平平即項工課，儂咧做，三兩下手就好勢；抑伊高貴工來做，ni-ni-sinn-sinn，是有較幼工，總--是險仔袂赴儂个時。

（Pênn-pênn tsit-hāng khang-khuè, lâng teh tsò, sann-nn̄g-ē-tshiú to̍h hó-sè; iah i ko-kuì-kang lâi tsò, ni-ni-sinn-sinn, sī ū khah iù-kang, tsóng--sī hiám-á bē-hù lâng ê sî.）

漢字僫稽考：ni-sinn，台日大辭典寫「拈生」，但是若是「生」--字，照講漳腔著唸做 senn，但是 ni-sinn 敢哪無儂講 ne-senn？

倚音異義詞：nih-sinnh，形容一个儂歹手爪[pháinn-tshiú-jiáu]，愛共儂偷拈[ni]、偷提物仔。

© 潘科元 2013 版權所有