我研究所聽月球唱片所出个台語唸歌錄音帶了後，經過足濟年，才開始家己試寫四句聯。
機緣是手機仔時行起來了後，當時我佮一个查某囡仔遠距離交往，伊佇台南有去上台語拼音班，用手機仔拍四句聯簡訊予我，我看伊寫甲離離落落，就共伊鬥修改，後來我家己自然就開始主動寫予伊。
過無偌久，就創作出一大篇个〈復興台語四句連〉，去參加台語文學獎个詩組，儂彼[he]「詩組」雖然無明文規定，但是其實攏是寫格式自由个新詩，我寫即號古魯術古、形式死板，欠缺現代文學感个物件，白目去投稿，害評審真頭疼，賜我一个特別賞。
因為有即段經驗，後來我咧教台語羅馬字个課，攏一定會安排一擺作業，叫學生用手機仔拍台羅簡訊予我，效果真好。
閣進展到 Line 个時代，我佇外口教儂做四句聯，也一定會鼓舞學員組一个 Line 群組，逐工寫四句聯來相褒互動。
怹到底有按呢做--無？我也無閣去追蹤，恐驚怹是無遐骨力。不而過，最近我參加一个 Line 群組，內底攏是新竹苗栗一帶，國小个台語老師，怹正實定定咧寫四句聯，相褒答喙鼓，互相關懷，足感心！以下是對怹个禮讚：
環境不利無失志 [Khuân-kíng put-lī bô sit-tsì]
寶惜母語有堅持 [Pó-sioh bó-gí ū kian-tshî]
四句傳訊好情意 [Sì-kù thuân-sìn hó tsîng-ì]
走傱教課無停時 [Tsáu-tsông kà-khò bô thîng-sî]
Comments powered by Disqus.