即張圖片是用閩南話羅馬字所寫个手稿，改寫做漢字是：
吳溫柔今年80歲
大約10歲學讀
著先讀《字母》，才讀《問答》
才讀《記略》，才讀《聖詩》
若專心讀 1 個月會讀
聖經
我現在有 7 个囡仔，3 个男个
4 个女个
我現在是用羅馬字佮第
3 个小妹通信
圖片出處是許長安、李樂毅編《閩南白話字》，北京 語文出版社 1992.
是按怎七、八十年前，佇台灣、福建，無受過任何教育个囡仔儂，怹佇教會个學堂，只要學幾個月仔羅馬字，甚至專心讀一個月爾爾，就會曉讀羅馬字聖經？有智識、有資源个現代儂顛倒無法度？
一--來，是長期用漢字，腦筋已經硬掙[ngē-tsiānn]（包括意識型態），無法度適應拼音文字；二--來，實在是因為無決心、無下工夫，未曾未 就放棄。
只要逐工用一點鐘久來練習羅馬字讀寫，半年至一年內絕對有才調家己輕鬆讀出白話字紅皮聖經（二十世紀初巴克禮版白話字聖經个語言風格，現代一般台語儂用聽个嘛感覺奇怪，這毋是寫羅馬字抑是漢字个問題，所以咱即馬著用1972年个台語羅馬字紅皮聖經來試驗）。即種學習功效，絕對毋是漢字教育綴會著个（跟得上的）。這毋但有教會老大儂个見證，我教儂羅馬字个經驗也是按呢。
台文界个先進內底，也有長期用漢字創作台語文，已經得著袂少台文賞，但是猶原對家己个台語、台文無足把握，越頭來讀全羅馬字个台語文獻了後，程度、眼光、自信，才提昇到一个新坎站。
有心欲復興台語、建立台文，若無好好仔利用羅馬字，是足大个損失。
以上个主張，有得著出版界先進來賜教，伊憢疑我个看法，引用聖經公會網站个資料：
『既使是長期受台語文耳濡目染的長老，除了教導羅馬字的老師外，能夠隨手一翻「羅馬字聖經」就能琅琅上口的，大概沒有幾位。』
迄篇文章我也看過，照我所知，這並毋是一開始就按呢，是受著國民黨長期个迫害，佮台灣社會慣勢使用中文，整體大趨勢个影響。自 1885 年每月出版，連續出到 1968 年，發行八十幾年，全部採用羅馬字个教會公報，最後被迫改用華文漢字出版。
國民黨甚至沒收羅馬字聖經，禁止基督徒、天主教徒使用。閣經過 1970 年代到今仔日二十一世紀，長老教會个會友，才會對羅馬字非常生疏，讀起來足困難。
遐个讀羅馬字感覺困難个會友，咁有下過工夫？像我所講，一日用一點鐘久，連續一年久來練習羅馬字讀寫？就準講確實閣有困難，問題是，一个文盲，學漢字一年了後，咁有法度讀中文聖經？
頂面引用个文章有提起：『它（台語漢字本聖經）使閱讀者不需要先去適應台語羅馬字的八音，只要略具台語基礎稍加練習後即可流利的朗讀。』
問題是，閱讀者事先已經用幾年久學漢字？若無用平濟个時間來學羅馬字，欲按怎下定論講，本質上，羅馬字不如漢字好讀？
這主要是學習環境佮資源个問題，袂使得講，佇台灣現代社會推廣台語羅馬字，發生困難，就牽拖羅馬字先天不良，咱愛看閣較久長个歷史證據佮實驗成果。
我從來無主張羅馬字佇各方面攏比漢字較好，漢字表義个功能當然較強，毋過我欲強調佮提醒，羅馬字有伊真寶貴，無法度用漢字來取代个優點。
Comments powered by Disqus.