學月琴个新坎站

最近家治練月琴，不知不覺行上[kiânn-tsiūnn]一个新坎站－－加練一套音階指法。阮一開始是學唸歌个系統，月琴內線調 Mi (E3)、外線調 La (A3)，這是彈江湖調上適合个定絃，但是拄著低音彈到 Re 个歌曲就無法度。

我即馬無改調音，但是用移調个原理，升一个全音，將 Mi / La 空線當做 Re / So 咧彈，兌指[thǹg-tsáinn]嘛愛綴咧改變，按呢我買个歌譜所有个歌曲攏會彈得囉！月琴个構造真簡單，用即步來變竅，真肆是。

台灣諺語講「慣者為師 kuàn--tsiá uî su」，兩套指法換來換去，無像拄開始所想遐困難。