2012-06-25 月琴移調彈奏技巧分享：
前提：我个月琴是「四相九品」（師傅黏了無整齊，四相个所在音無啥準），九品是採用西洋十二律制。 內外線定絃音用 e (低音Mi)、a (低音La)，按呢外線就彈會出 6.、7.、1、1#、2、3、4、4#、5、6、7、1、2、3 遮个音。
因為毋是所有个半音攏有，所以欲移調彈奏，無法度像 guitar 遐爾隨意。 總是，猶原有寡辦法。針對傳統五聲音階（重點勿出現 Si (b1) 个音），而且音域無超過兩个八度个歌曲，就會凍按呢做：
一、一首歌个音域若上峘到「峘音1」，就可以照簡譜來移「升大二度」。 就是將月琴內線準做「低音Re」，外線準做「低音So」來看待。 本來無法度彈个歌，變做會使彈。親像江湖湖轉唱都馬調个時，就用即步。
二、一首歌个音域若上低到「低音5」，就可以照簡譜來移「降小三度」。 就是將月琴內線準做「低音So」來看待，外線準做「Do」來看待。 本來音域傷峘（太高），咱歹唱个歌，用即步來降小三度，就變好唱。
我將以前學過个歌曲，一塊一塊來試，有真濟攏「一首變做三首」，有三套指法隨在我練習囉！而且我看原來个簡譜就有法度直接彈出來矣！ 但是指頭仔已經培養出來个反射動作，愛閣繼續勤練，才會凍切換自在。
2012-07-26 補記：
後來有去「先進樂器行」開六百箍，重黏四相，雖然無足滿意，音準總是有改善囉。
台南蘇秀香老師有編一本《今月琴聲》，伊是用五度定絃。分做三種調：
一、C 調（2. - 6. 空絃），內外線定 D3(Re)、A3(La)。
二、G 調（5. - 2 空絃），佇無改變第一種定絃个前提下，將外線 A3 當做中央Re來彈，等一是降小4度。5. 个位置唱首調 Do，所以叫做 G 調。
三、D 調（1 - 5 空絃），本來个 2. 唱做首調 Do，所以叫做 D 調。這會使理解做是升大2度，抑是降7度。
伊按呢做，致使真濟歌曲，用伊所講个 G 調來彈个時，大大減少兌指[thǹg-tsáinn]个需要。對我來講，唱起來嘛加足輕鬆，總是，按呢彈，聽起來聲音卡悶，無像照 C 調來彈遐響亮。
蘇老師个 G 調，佮我家治體會著个「降小3度」彈法相通，因為伊內線加降一音，所以規个愛降小4度來彈，音階才會攏有，甚至比我个降3度閣卡完整，連 Si 嘛無問題矣。
蘇老師个 D 調，佮洪瑞珍老師个 G 調相通。洪老師號做 F 調、G 調，真奇怪，設使伊是定絃做 A3、D4，按呢叫做 F 調、G 調才無問題。但是我請曾于菁老師幫我聽，伊講洪老師是調 G3、C4。
我即馬會曉足足四種音階指法啦。
Comments powered by Disqus.