孽詰仔話

有一種孽詰仔話[gia̍t-khiat-á-uē]毋是「歇後語[hiat-hiō-gí]」个形式。親像聽著儂講：「阮卜來轉[tńg]」，著應講：「轉[tńg]，哪干樂咧。」「轉[tńg]」即个詞素有兩種意義。閣親像聽儂講：「來去共講」，著應講：「講[kóng / 管]，一支長長啦。」這是利用「講」「管」兩个共音無共意个詞素來激五仁[kik ngóo-jîn]。

轉去厝裡，佮干樂塊轉有tī-tāi無？對儂講，佮管个長長，有干礙無？就修辭比並[phīng]來論，無定[tiānn]有喔。著準，第一个想出這兩句話个儂，無想遐儕，咱un-ná會thang按呢想。

一百冬前个《日台大辭典》，有收著「五百斤鹽鑄一口鼎[Gōo-pah kin iâm tsù tsi̍t-kháu tiánn]」，閣有「鹹菜有一因[Kiâm-tshài ū tsi̍t-in」。這閣是另外一種孽詰仔話。1931年个《台日大辭典》猶原攏閣有收。總是，兩phō冊攏無將伊个語源講透機。

在我扑算，前--者，著是「五百年前註定」，若卜半滾笑，講啥乜代誌攏註好好佇--塊，著講出迄句話。後--者，著是「檢采[kiám-tshái]有一因」，差不多佮「其中必有緣故」用佇共款都合。《台日大辭典》寫做「鹹菜有一絪」，伊有講出「絪」佮「因」共音這層个關係，毋閣無講出「鹹菜」佮「檢采」倚音个牽連。

「絪」是量詞，拗拗縛縛做一束个形體叫做絪，嘛會使做動詞。阮細漢定定看著阿嬸姻塊絪柴絪仔thang仔long落去灶空燃[hiânn]火。

傳統戲劇袂少即款孽詰仔話。從中[tsiông-tiong]，有不止儕是對文言縒音[tsua̍h-im」--來-个，予三花[sann-hue]或是三八旦[sam-pat-tuànn] thang激詼諧[kik khue-hâi]。

歌仔戲个三八小姐一下出來，自我介紹了後，閣講伊今仔日毋知按怎，「心肝爛爛[nuā-nuā]塊lop」。邊=仔查某kán聽著，閣講一擺。小姐罵kán婢爻uân話，講伊是卜講「心肝悶悶不樂[būn-būn put-lo̍k]」。即種縒音，siat-thái精彩，描寫出來个形象佮音響攏真鮮tshioh，修辭个功力一流媠。

「痟狗蜘蛛 縛[pa̍k]，半暝仔hám點心，滿椆[muá-tiâu]个豬仔囝 貴，一箍銀買三四十斤」布袋戲个痟公子一出台唸出即段莫明其妙个話，後台个儂共thuh講，是按怎豬仔囝起價，一箍銀閣買tio̍h四五十斤。伊對喙應講，伊是塊唸：

少小須勤學。
文章可立身。
滿朝朱紫貴，
盡是讀書人。

Siàu-siáu su khîn-ha̍k.
Bûn-tsiong khó li̍p-sin.
Buán-tiâu tsu-tsí-kuì,
tsīn sī tho̍k-su-jîn.

這是相傳宋朝汪洙所做〈神童詩〉其中一首。汪洙九歲會做詩，儂叫伊汪神童。

布袋戲師傅塊學口白，無的確有讀冊，頂面這首詩姻塊唸，袂凍tsiâu正確，有个會縒幾字仔去。可比，「少小[siàu-siáu]」無唸勾破，變做siáu-siáu；「朱紫貴」會成做tsu-tsìn-kuì。傳寫劇本个時，著變做「小小」佮「諸進貴」。

「Hám點心」个"hám"佇遮是大食个意思，佮"hmh"共款。即兩个詞素大概攏是對「出力摃」个本義引申來个笑詼講法。"Hám" 有兩音節个詞，號做 "hám-sâm"，"sâm"佮「嚵/饞[tshâm]」毋知有關涉[kuan-sia̍p]無？本字派个台語學者諒必會將hám-sâm寫做「噉嚵」。

下昏暗著猴，相紲寫三篇。敬請列位朋友道，指教批評毋通無。小弟頇顢寫無好，無相棄嫌看tshit-thô。