對看[tuì-khuànn]

「相親 siòng-tshin」，阮細漢聽序大儂攏講「對看 tuì-khuànn」。

即个漢字「看」，造字个道理，是佇「目睭」頂峘畫一支「手」，意思就是：攑手起來額頭[hia̍h-thâu]，用手蹄仔[tshiú-tê-á] 遮[jia]日，通[thang]來好好仔觀看、觀察遠遠个所在。親像孫悟空替怹師父[sai-hū]做前探路，peh上樹頂、山崙[suann-lūn]，攏會做个動作就著啦^^

「對看」嘛是按呢，雖然是面對面，但是雙方過去無相捌[sio-bat]，所以愛特別細膩，斟酌來觀看、觀察對方，才袂嫁娶毋著儂，誤著終身，所以才講「對看」。

若是糖甘蜜甜个愛人仔，袂凍做伙，就愛換唱講：「每日思念汝一儂，袂得通相見[sann-kìnn]」。即陣是用「見」个，毋是用「看」个。汝看即个「見」--字，是坦邊身[thán-pinn-sin]个漫畫素描，目睭褫[thí]甲大武蕊，「目」下跤一撇是手，一曲跤[khiau-kha]是身軀，規个不成比例 XD

但是若愛人仔艱苦倒在床，咱應該去共伊「看」，毋是去「見」--伊。即个「看」就是對觀看、觀察引申出「探視、探望」个意思。

「看見 khuànn--kìnn」兩字定定做伙出現，即陣，「見」是「看」个「結果補語」，愛唸輕聲，而且定定攏會簡化，變 khuànn--ìnn，閣進一步連音，變 khuàinn。「看毋見 khuànn-m̄-kìnn」，是汝出力看，但是猶原看袂著。勸世歌 唱講：「儂个尾溜看毋見，圓--儂會扁# 扁#會圓」。俗語講：「狗尾搖hìnn-hìnn，儂尾看毋見」。咱去佮儂「對看」，欲看會見彼此个未來，彼是真僫。現代儂未曾結婚，就同居，咁著看會見未來？

「見」个古體字（甲骨文、金文……）參考 http://vividict.com/WordInfo.aspx?id=588
照上古所畫，咱有理由相信，倉頡先生怹是外星儂。^^

台語佮「看」有關个動詞佮用法閣足濟，足幼點，即篇只是欲解說「對看」个道理爾爾。