帖(thiap4)

英文 card 意思真闊。北仔話、日語、台語攏有引進即个外來語，不而過，台語kann2是用日語佮北仔話个二手貨。像 khah4-looh4 就(ciu7)是日語个，抑若北仔話个，彼著儕咧--no0。

即个外來語用字「卡」究竟按怎唸才好？有儂唸做 khah4，有个唸做 kha2。唸做 khah4，像 kian7-po2-khah4 (健保卡)，按呢「卡片」个「卡」變調做高降調，就"卡"合台語本調、變調个規則。若無，若是單字調讀做 kha2，按呢「卡片」个「卡」照講著愛變做高平調，毋閣罕得聽著儂按呢講。總是，我家治攏一律共唸高降調。

有一種是一張ciau5細張，袂使拗--著，ting7个卡，像電話卡、健保卡、信用卡、提款卡；閣一種是大常攏有拗个卡，像生日卡、感謝卡、教師卡。前(cian5)--者扑算是新事物，且一邊 (chiann2-cit8-pinn1)；後(hio7)--者，過去个漢人咁無即號物，漢語咁無即號話？

在佇我想，彼應該著是「帖」(thiap4)。

即馬个《台日典網》功能越愈(uat8-ju2) ciau5-cng5，會凍用 wildcard 來查詢，無 gi7-niu7 个好朋 thang1 去試看昧：佇漢字迄格扑 *帖，會記得使用「*」當wildcard字元頭前个格仔愛點一下。查看有外儕詞用著「帖」--字。兩字詞，像「請帖 (chiann2-thiap4)、謝帖 (sia7-thiap4)、催帖 (chui1-thiap4)、紅帖 (ang5-thiap4)、白帖 (peh8-thiap4)」。另外，「帖」个用途閣不止闊，無卡輸 card。

有一擺我問學生講：「我叫恁寫卡片，汝咁有咧做？」因為晉前我嘛共姻交代真儕遍，叫姻著愛隨時筆記、整理家治學習--著个台語材料、心得佮疑問。一个傷 sik4 个學生就應我講：有哦，母親節到矣，阮攏嘛有寫母親卡。即个「卡片」意思太包含矣，資料卡嘛是卡片，寫予儂表達情意个嘛是卡片。

意思等一是「感謝卡」个在來詞 (cai7-lai5-su5)，我想是「謝帖」(sia7-thiap4)。毋閣其他種種个卡：賀年卡、生日卡、問候卡，ing2時漢人拄著即種情形，檢采是寫批無寫帖。除非汝寫个批，ciann5做書法藝術品塊予後代儂欣賞，才會 pinn3-ciann5「帖」。

總是，「帖」即个詞素佇ing2過有生湠出袂少語詞，抑現此時都已經斷產 (tng7-suann2) 喇。

帖仔 (thiap4-a2)，現今攏是講紅帖仔，「某儂放帖仔來」，就是卜結婚矣。不過，ing2早講「出帖仔」是寫歹話中傷儂。中華民國所辦个選舉，逐家真興(hing3)使(sai2)即步。

註：斷產 (tng7-suann2)：停經，更年期到。