【師父】佮【師傅】

華語【師父】佮【師傅】，呼音共款，寫法其實嘛濫來濫去。佇遮特別講究共分，【師父】是信眾對出家儂个尊稱；【師傅】是一般儂對有技術的專業者的尊稱。若是對教你工夫（包括武藝佮一切技術、學問）个老師个尊稱，「師父」「師傅」攏有儂寫。總是，因為華語呼音無分，煞影響著現時的台語儂，講台語定定亂去。

台語有分 su-hū 佮 sai-hū，對應頂面的【師父】佮【師傅】，發音各樣，愛特別注意。抑漢字無的確著照華語按呢寫。親像《台日典》sai-hū 是寫做「司阜」，這無佇遮稽考。

閣來，是卡深的問題：請問孫悟空[Sun Ngōo-khong]、豬八戒[Ti Pat-kài]、沙僧[Sua-tsing]怹愛按怎叫唐三藏[Tông Sam-tsōng]？

蓋濟儂會想講，因為唐三藏是出家儂，所以孫悟空怹愛叫伊師父[su-hū]，按呢無妥當。儂布袋戲个老師傅[sai-hū]怹塊做西遊記，是叫「師傅」[sai-hū]。

是按怎？孫悟空怹是唐三藏个「徒弟」[tôo-tē]，相對於徒弟，著是「師傅」[sai-hū]。任何儂攏thìng好叫唐三藏「師父」[su-hū]，獨獨孫悟空怹三个才有資格叫伊 sai-hū。亦著是講，對怹來講，叫 sai-hū 才卡親，叫 su-hū 顛倒生疏去矣。

師傅會使對應「徒弟」，嘛會用得對應「師仔」[sai-á]。「徒弟」感覺卡成是學武功个，抑是卡古早味的講法。「師仔」是一般塊跟師傅學謀生的專業技術迄種，華語著講【學徒】。華語【收學徒】，台語愛講「牽師仔」[khan sai-á]。

即个動詞「牽」--字，真有意味，本底是具體个動作，可比大儂牽細囝行路。進一步引申做有能力的頂輩，「牽教」[khan-kà]、「牽抾」[khan-khioh]拄塊學習、成長个下輩。形容即種頂輩對下輩个「提攜」[thê-hê」、「循循善誘」[sûn-sûn siān iú]，閣有講「牽溝過隙」[khan-kau kuè-khiah]。

「牽」--字佇台語，閣有袂少特別个用法，攏真儹。