平正心

台灣儂予統治集團洗腦洗甲連心肝 to 歪 tshua̍h--去，致到[tì-kàu]對家治个話語 kha̍p 袂著就嫌歹聽囉、粗魯囉、抑是無精確、無suah-phah、無夠用囉，攏總話--了--了，全然無 kah 一 sut 仔反省个才調佮意願。我上 tsia̍p 講起个例就是「駛車」，請參考我 íng-kuè 寫个「發車、開車、駛車」。今仔日閣拄著一个例，「拜幾」[pài-kuí]。

有儂講「拜幾」个「幾」[kuí] 佮「鬼」[kuí] 共音，問儂「今仔日拜幾？」袂輸塊講「今仔日拜鬼」咧，真歹聽。毋閣足龜怪，in 塊講北仔話【我們現在已經上軌道了】，suah講到蓋自在，攏袂想講，伊是塊講【上鬼道】，是塊落陰府，過奈何橋。

最近真鬧動个【李家兄弟搞軌案】，媒體用【搞軌】就是有【搞鬼】个意思。即个雙關語報紙電視報 hiah 久，嘛無儂會要求講，此去，勿閣用【軌】即个字抑是即个音，卡袂歹聽或是歹吉兆。

對北仔話逐家攏 hiah-ni̍h仔包容、尊tshûn，是按怎對咱个母語，著一工到暗塊嫌 bái？有儂講文言文个物件，tsiâu 攏過時矣，台灣話卜復興，勿閣去讀啥麼三字經、昔時賢文、將進酒、抑是幼學瓊林即寡 àu-kóo貨。儂伊亦有伊个理路直 [lí-lōo-ti̍t] 啦，可比講「昔時賢文」有一句「兒不嫌母醜，犬不厭家貧」[jî put-hiâm bió tshiú, khián put-iàm ka pîn]，這佇目今[ba̍k-kim] 世上 [sè-tsiūnn]，有影是「放狗屁、狗放屁、放屁狗」puh.puh.puh..put 通。

最後我卜唸兩句話：心肝臭臊 [tshàu-tsho]，清氣嘛講 thái-ko；思想觸惡 [tshik-òo]，照顧 [tsiàu-kòo] 聽做褪褲 [thǹg-khòo]。

後回繼續。