《廈英大辭典》來歷
英國長老教會杜嘉德牧師(Rev. Carstairs Douglas)1830年12月27日出世，二十五歲， 1855年對英國來到香港，轉[tsuán]上海，到廈門，慘淡經營當地的長老教會。
十八年後，1873年，伊四十三歲，出版《廈英大辭典》（原冊名 Chinese-English Dictionary of Vernacular or Spoken Language of Amoy, with the Principal Variations of the Chang-chew and Chin-chew Dialects ）。 以廈門話做主體，兼收漳州、泉州、安溪、永春、台灣、惠安、灌口、南安、 漳浦[Tsiunn-phóo]、同安[Tâng-uann]、長泰[Tiô-thuà]各地的特色語詞。
杜牧師為著出版這部冊，著趁休假，坐船轉去英國的時，踮倫敦揣印刷廠排版。 倫敦無漢字的鉛字thang用，而且廈門話真濟詞素的漢字僫決定， 所以廈英典歸部冊無用著漢字。
杜牧師佇本冊的英文頭序有一段，大意是講：
我向望兩三年內編一本指南或是續編，通將所知的漢字收入去。 一方面我感覺這部冊無漢字無彩，但是我也歡喜本冊無漢字。 因為按呢會使證明廈門話是一个獨立的語言，毋免倚靠漢字來徛起。 我希望閣較濟人得著鼓舞來學習這種語言， 檢彩𪜶已經予這个詞言的複雜佮奇怪的特性拍敗矣。
（目前咱看中研院的廈英典網路查詢版所提供的原冊圖檔， 佇每一字目的頭前有毛筆寫的漢字， 彼是林茂生博士𪜶老爸林燕臣牧師當年手寫的。）
《廈英大辭典》是有史以來到今仔日，所有的白話字閩台語辭典內容上豐富、 解說上精密，成就上蓋懸的一部。杜牧師也因為這部辭典，得著伊的母校英國 Glasgow 大學頒發名譽博士學位。
閣過四年後，1877年，Douglas牧師不幸致著落吐症（霍亂[hok-luān]）， 佇四十七歲來過往。
《廈英大辭典補編》來歷
英國長老教會巴克禮牧師(Rev. Thomas Barclay 1849-1935)，出世佇英國蘇格蘭 Glasgow。伊大學畢業，讀神學院，研究電氣學，閣去德國遊學半年。
1873年見著杜嘉德牧師，當時杜牧師對廈門休假，轉來到英國發落廈英典排印出版的事工。 巴克禮受著杜牧師的款勸、鼓舞，後來決心過來台灣佈道。
1873年杜牧師的廈英大辭典出版，隔轉年，巴克禮牧師來台灣，閣過廈門， 開始學咱人話。伊佇打狗佮府城的神學院任教、傳福音，1885年創辦白話字報紙 （也是台灣第一份報紙）Tâi-oân Hú-siâⁿ Kàu-hōe-pò（「台灣府城教會報」 也就是「台灣教會公報」的前身。）
白話字教會公報一直延續到1969年3月，1050期，前後84年久。因為國民黨的迫害， 閣來姑不將改用華文漢字書寫。
巴牧師有三部重要、偉大的台語編作：
1923年 Supplement to Dictionary of the Vernacular or Spoken Language of Amoy， （《廈英大辭典補編》）
1916年 Lán ê Kiù-tsú Iâ-so͘ Ki-tok ê Sin-iok Tsoân-su （《咱的救主耶穌基督的新約全書》）》，巴牧師主譯，根據希臘原文。
1933年 Kū-iok ê Sèng-keng（《舊約的聖經》），巴牧師主譯，根據希伯來原文。
巴牧師新譯聖經進前个廈門話白話字聖經，是幾若位牧師對文言漢文譯本（委辦譯本）， 二手轉譯的，譯文的話句簡捷、文詞雅氣，總是意思佮原文有袂少出入。 1913年廈門的牧師開會決議全權委託巴克禮牧師重譯聖經，閣請伊來增補《廈英大辭典》。 彼年甘為霖牧師也佇日本橫濱刊印《廈門音新字典》。
巴牧師直接根據希臘文新譯的白話字新約聖經，兩年後完成， 送去日本橫濱福音印刷所排印，1916年五月正式出版。 這部新譯本予巴牧師佇1919年得著 Glasgow 大學頒發的榮譽博士學位。
1922年，巴牧師去上海商務印書館監印廈英典補編，1923年出版， 離杜牧師廈英大辭典初版足足五十冬矣！
廈英典補編每一个字目頭前就有印漢字。所收的舊詞新義佮新詞包括台灣佮 廈門雙爿的語料。從中有袂少語詞，後來總督府出版的兩大冊臺日大辭典 （1931-2出版）也無收著。
例：廈英典補編p.577:
cha̍p-mo̍͘hⁿ, feeling anxious, out of sorts, or uncomfortable about many affairs (v. mo̍͘hⁿ). cha̍p-mo̍͘hⁿ-hio̍h, various leaves used for adulterating tea. cha̍p-bo̍k-hio̍h, various leaves used for adulterating tea. thàu cha̍p-mo̍͘hⁿ-hio̍h, to adulterate tea with them.
（註：這个詞阮講 tsām-mo̍oh）
不而過，廈英典補編、台日典，攏無收現代台語常用詞ku-moo。 按呢看起來，咱欲學台語，對教典出發是真好，總是，欲對台語有較全面、 深入的認捌，也是著時常參考早年經典性的工具冊。
三部重要的閩台語白話字辭典，攏無法度佇當地印刷，編者著愛設法去到遠遠的外地、 外國，揣設備好、技術懸的出版機構處理。咱著閣較珍惜遮的文獻。
- 廈英大辭典 杜嘉德牧師編 1873年 英國倫敦刊印
- 廈門音新字典 甘為霖牧師編 1913年 日本橫濱刊印
- 廈英大辭典補編 巴克禮牧師編 1923年 中國上海商務印書館刊印
以上的辭典佮聖經，攏是用廈門話做主體來寫的，佮目今台語的主流腔口有出入。 若是白話字教會公報，著看逐篇文章無仝的投稿者用啥物腔，其中有真濟是用台灣南部腔。 欲查教會公報全文檢索系統的時，請會記得兩種腔口攏試看覓，可比講欲揣有提起「火船」 的文章，一定愛用 hoe2-chun5 佮 he2-chun5 兩種攏去試，才會搜著完整的資料。
參考資料：《臺灣文獻書目解題：語言類》作者：洪惟仁。國立中央圖書館臺灣分館1996年出版。
（本文欲做教典營教材，用字遵趁教育部推薦用字。）
Comments powered by Disqus.