廈門會文堂兩版梁祝歌仔冊比較一小段

廈門會文堂宣統元年(1909)出版《最新梁三伯祝英台遊學歌》佮《最新英台吊(弔)紙歌》，合起來計共 466 葩，就是完整个梁祝故事。

五年後，民國三年(1914)會文堂閣出《增廣梁三伯祝英臺新歌全傳》，攏共 323 葩，比 1909 舊版，毋但內容變少，故事連貫性也較差，但是煞另外加出褻體[siat-thái]个描寫，比較以下即段情節：

1909版：
二人相招入亭去 英台一時春心起 胸前獻出兩粒乳 卜乎我哥來看見
三伯看見心歡喜 近前伸手來抱伊 早知賢弟是女兒 在甘冥日放身離
英台伸手就共指 枉爾一身做男兒 塗做饅頭不起駕 枉費同床有三年
雙人恩愛卜成親 外面打門緊如箭 英台開門出來看 安童著狂來卜死

1914版：
二人相招入房去 英台心內用計智 胸前獻出兩粒乳 卜呼梁哥來看視
三伯看見笑唏唏 近前雙手來抱伊 早知賢弟是女兒 在甘冥日放身離
英台伸手就潑離 枉你一世做男兒 塗做饅頭不起駕 豬母上樹驚半死
三伯被罵心輕鬆 恨我呆癡千萬般 近前雙腳跪落去 哀求賢妹作情意
攬抱英台尿那濺(!!!) 弄獅戲球遍身汗 雙人相招入床去 外面門聲急如箭
英台開門出來看 安童著狂來卜死 安童說出姑娘聽 安人差阮來起行

「胸前獻出兩粒乳」即个戲文，從到今攏有咧搬演，歌仔戲攏閣看會著，戲服外重个衫仔襟[khim] 掀開一角，意思一下就好。但是1914版迄句「攬抱英台尿那濺[tsuānn]」咁袂傷出土？

我見識淺薄，民間文學大概難免出現即種予儂莫明其妙个內容。

不而過，「弄獅戲球」用來暗喻男女交合，是來自「雙獅戲球」个典故，傳說講獅公、獅母兩隻做伙咧耍个時，獅毛相纏絆[sann tînn-puànn]，絞做一粒球，內中生出獅仔囝。