弓蕉（香蕉）个台語量詞

華語﹝香蕉﹞，台語叫做「弓蕉」，發音至少有三種：kin-tsio、king-tsio、kim-tsio。以早个台語文獻，通常寫「芎蕉」，但是「芎」是藥草名，親像四川出產个，就叫做「川芎 tshuan-kiong」，這佮「弓蕉」差卡遠，所以我佇遮採用教育部推薦用字个寫法，解說做：因為弓蕉形體彎彎，親像弓，所以才叫「弓蕉 king-tsio」，後來音變，唸做 kin-tsio。另外有儂主張講，日本時代弓蕉足貴，而且怹是唸做kim-tsio，所以愛寫做「金蕉」。總是，kin-tsio是自古就有个物，古早伊無偌貴，閣再透過方言比較，咱知影，寫「金蕉」是無妥當个。

相片內底，是對一欉弓蕉欉割落來个所有个弓蕉，單位叫做：一弓[king / kiong]，抑是 一簍[lóo]（屏東个講法）。

若是華語講个「一串香蕉」，台語愛講「一枇 [pî]」。烏魚子嘛算「枇」。

若是華語「一根香蕉」，台語有講「一只 [jí / gí]、一莢[ngeh / ngueh]、一條[tiâu]」。豆仔嘛算「莢」。

所以台語有分三種層次个弓蕉單位詞，咱愛會曉講，才是合格个台語儂。因為各地講法真濟種，少年讀者諸君上好轉去問序大儂，看恁當地按怎講。

相片提供：釋照勝先生。感謝伊，嘛感謝相片內即位祖媽級个美人má-tooh。這是日本時代台中青果合作組合个宣傳相片。