後來 vs. 後--來；總是 vs. 總--是

過去个文獻，「後來」「總是」攏無標輕聲，但是咱現代台灣儂普遍攏有輕聲。我認為會用得按呢來分別伊个用法：

一、後來、後--來

1. 「後來」，將來个意思。例：「就準講台語會亡，咱嘛著好好仔記錄台語，通予後來个儂知影這是一个偌爾仔寶貴个文化。」

2. 「後--來」，相對於一个卡頭前个時間點，咧講迄个時間點以後所發生个代誌。例：「巴牧師先出版白話字新約，後--來，才出版舊約。」

二、總是、總--是

1. 「總是」，總講一句、一切攏是。例：「總是汝家治做得來个，莫得[bo̍h-tit]怪[kuè]--儂。」

2.「總--是」，語氣轉折詞，有時單純表示「但是」；有時是佇考慮各種可能互相矛盾个情形了後，做一个小結論。

例：「即項媠是媠，總--是，卡無擋[tòng]。」
例：「阿君卡巧，阿華卡媠，總--是，我上欣賞阿芳个溫純。」