以下是我佇facebook綴即个事件个發展，所寫个評論，一開始是自由時報先發現，馬總統已經決定欲提名个新任大法官，其中竟然出現舊年白玫瑰運動所抗議个對象，最高法院審判長邵燕玲。我寫講：
三歲囡仔受著性侵害，囡仔哭講：「不要！」即个審判長猶原認為，無法度證明加害人違反被害人个意願，所以改判輕罪。舊年即項代誌引起幾十萬儂連署抗議，發起「白玫瑰運動」上街頭遊行。馬總統回應講：欲趕緊制定「法官法」，淘汰無適任[sik-jīm]个法官。
結果人民个抗議不但無促成馬政府進行任何改革。現在馬英九顛倒閣欲提名即个法官升做地位上峘个大法官！
佮意、支持馬英九个朋友 同學啊，恁當[tang]時才會覺醒？
了後立委嘛出來批評，總統府才趕緊進行「危機[guî-ki]處理」，我寫講：
新消息，馬總統準備好欲提名予伊做大法官个「恐龍法官」邵燕玲「自我了斷」（恐驚是總統府指示个），「懇辭提名」，總統換提名湯德宗。（邵燕玲著是舊年兒童性侵案改判輕罪，引起社會大憤慨，迄个最高法院審判長）
無論按怎，馬英九早著批文同意邵燕玲做大法官，今仔日只是安排形式上个接見。馬--个可能根本毋知影邵--个著是迄个「恐龍法官」（小馬哥啥乜代誌攏嘛隔工看報紙才知影），部下提公文來，伊就戇戇仔簽名。伊嘛有可能明知影，閣簽同意。
無論佗一種情形，馬英九閣再一擺證明伊是一个無道昏君[bû-tō hun-kun]！
後來新聞報講，馬總統真正是看新聞才知影伊欲提名个儂是啥乜底係[té-hē]，伊佮蕭副總統同齊上電視會失禮。我閣寫：
提名大法官，是何等重大个人事案！即對糊塗侗戇[tòng-gōng]个中華民國正副總統，啥乜代誌攏是看報紙才知！馬總統根本毋知影被提名人个來歷、好歹，幕僚提公文來，伊著戇戇仔簽准。
馬英九本身是學法律个，伊連法律界个儂都[to]攏遮生疏，伊是欲按怎選會出可靠个專家來制定核能政策？伊強調講，核能是專業問題，愛交予專家決定，伊家治無半撇，代誌放予下跤手儂佇咧舞豬弄狗，瞞父騙母。伊想講，只要國民黨官商利益集團，繼續扶[phôo]伊做總統，伊穩心仔靠一支媠面，看報紙治國就著啦！
我閣根據馬總統佇電視放送，親喙所講个話做評論：
馬總統講：『邵法官有提到最高法院對性侵案的判決，但是並沒有說她本人就是這個審判長。我當時也沒有問她這個問題，如果她當時真的這樣說了，我當時就會決定不提名她。』
做一个國家領袖，掌握一切个資源資訊，結果伊欲用一个儂，竟然只是根據對方所講个話！？到時核電廠地動爆炸，伊一定嘛是出來會[huē]失禮，講：『台電董事長有提到設計核電廠的抗震強度，但是並沒有說有施工不確實。我當時也沒有問他這個問題，如果他當時真的這樣說了，我當時就會決定核電廠停止運轉。』
舊年全台灣咧抗議恐龍法官，伊咁毋免了解講到底是啥儂判決个？是按怎一直攏毋知？
一个有夠格个領導者，咁毋免清楚一切个要點，做出對人民有利、予人民有信心个決策？即種毋捌三兩[sann-nn̄g]，大細項代誌，不時脫箠[thut-tshuê]个儂，講欲閣出來競選連任總統。世間汰會有遮爾毋知見笑个儂啦！
相關新聞連結：
自由電子報 -- 爭議法官邵燕玲，馬提名新任大法官 http://www.libertytimes.com.tw/2011/new/mar/31/today-t1.htm
中時電子報 -- 大法官突換人，邵燕玲下 湯德宗上 http://news.chinatimes.com/realtime/110101/112011033100992.html
Yahoo!奇摩新聞 -- 提名恐龍法官，馬看新聞才知 http://tw.news.yahoo.com/article/url/d/a/110401/4/2p26j.html
馬英九講伊事先毋知影 http://www.youtube.com/watch?v=Hs5bOs4j0gk
Comments powered by Disqus.