有朋友咧問講華語最近个流行語〔小三〕代表情婦个意思，這台語按怎講。卡早台語是將「伙計 hué-kì」婉轉來表示情婦。但是用一下久，「伙計」變做「情婦」專用个代名詞了後，著「污名化」去囉，像「查某」變做「妓女」个婉轉語了後，閣進一步發展，「查某」嘛污名化去。另外，若講「某儂佇外口有查某」，即个「查某」嘛是情婦个意思。
1931年出版个台日新辭書，對即个詞，有特別註明講：「伙計」表示「情婦」是北部、中部个用法，若台南是「辛勞、員工」个意思。可見阮南部社會卡單純，無像中北部，商業化了後，頭家蓋濟機會通去「鬥[tàu]伙計、結[kat]伙計」〔勾搭情婦〕。
南部个單純，表現佇語言上，閣有一例，像阮咧講，「去佮儂蹛[tuà]工場、蹛公司……」，後壁个受詞會使毋免，講「去佮儂蹛」，著是指出外去予儂倩，食儂个頭路。即種話，去到北部講，煞予儂抾笑[khioh-tshiò]，講阮去佮儂「同居」！
表示情婦意思个「伙計 hué-kì」，加一个「仔」，講 hué-kì-á 意思卡明白，即陣，kì 愛轉調做第一聲。
hué-kì 个 kì 是白話音，毋是咱即馬捷用个文言音 kè，罕用个白話音，往往攏表示彼佇古早古早个閩台語著有咧使用，我相信，伊原底完全只是表示一種正常个商業活動內底个人際關係，除了指員工，【台日新辭書】嘛有解說講，是表示「合資者」，親像「鬥伙計 tàu-hé-kì」本來是「佮儂股株[kóo-tu]」个意思。「連財伙計[liân-tsâi-hé-kì]」著是合資做生理个商業經營个關係。是社會型態變遷了後，「伙計」才出現「情婦」个意義。出名个周成過台灣故事，周成著是去鬥著一个本來是妓女个伙計仔，阿麵--仔。
華語〔姘頭〕台語叫做「搭頭 tah-thâu」
配合動詞來用，儂講有翁个查某「討契兄 thó-khè-hiann」、有錢个查某「飼金魚 tshī-kim-hî」（〔養小白臉〕）；有某个查埔「鬥伙計 tàu-hué-kì」，無某个查埔「結姼仔 kat-tshit-á」。這攏是無禮貌个話，毋通當面講--儂，無，對方的確會變面。
總--是，台灣華語「小三」即个新語詞，是佇華語个戲劇媒體產生出來个。但是台語个戲劇媒體本來著無資源、節目少，袂凍出現遮爾轟動、有話題性个戲齣，著無法度用即種方式來帶動台語新詞个創造，只好暫且利用舊語詞。問題是，〔小三〕整體个意義內涵，包括佇迄齣戲內底，「小三」个人格特質等等，當然毋是台語舊詞「伙計、阿麵--仔」會得完全表達个，這就是台語發展个困境，非戰之罪，是規个社會文化、教育資源分配無公道，致使新台語歹發展、生湠！
Comments powered by Disqus.