其實網路傳播个力量，已經超過傳統媒體，特別是對青年儂來講。若做了有起，網頁圖文、影片，點閱率毋但無輸電視節目，而且「長尾效應」加足強。
咱會使募集資源來製作一个類似「新聞挖挖哇」迄種性質个台語影片，透過網路放送。
一、氣氛輕鬆、心適，但是內容猶原充實、有意義。
二、講台語來討論台語相關个主題，尤其是最近佇主流媒體有出現个台語語詞、俗語、發音、用字、歷史文化問題等等。可比講：
(1) 新聞講，宇昌案造假，馬家軍「好好鱉[pih]刣甲屎流」。咱就用即个節目來討論講，正確个版本是「好好鱟刣甲屎流」[hó-hó hāu, thâi kah sái# lâu]。
(2) 張榮發捌講國民黨是「lām-muā 政府」。lām-muā 个語源、意義、用法是按怎？
(3) 馬英九佇辯論會講袂輪轉个話：「蕃薯毋驚落塗爛，只求枝葉代代湠」。即句俗語正確个台語、客語个發音，閣有背後个歷史、文化意涵。「蕃薯」、「芋仔」个比喻。 等等。
三、邀請幾个仔來賓，利用網路視訊技術來連線錄製。按呢會使扑破空間、交通个限制，方便分散各地个台語專家參與。
因為目前無即種資源，期待明年世局个轉變。不過，現步我會凍先寫網誌來討論頂面提起个一寡主題，雖然因為會曉看台文个儂無濟，傳播效力無啥峘，總是，這是扑基礎个工課。到時才請「收看」，勞力 ^_^
Comments powered by Disqus.