我佇facebook交朋友个原則

facebook 免錢予儂註冊利用，透過網路來連繫本底就熟似个儂，伊是商業網站，毋是國際慈善組織，伊个利純[lī-sûn]是靠廣告佮其他个收入。使用者佇註冊个時，攏愛點講汝同意伊个使用條款，其中一項是：

『您應該發送交友邀請給那些您在現實生活中有聯繫的人，像是您的朋友、家人、同事或同學。 』

但是我欲公開承認，我佇 facebook 所交陪个，大部份攏是本來無相捌[bat]个儂，但是我个出發點是全然个好意，想欲佮天下間个有心人進行有意義个智識交流、人文關懷。

閣卡重要个是，我對生份儂發出交友邀請以前，攏會先觀察伊有符合以下一、兩項無？

一、伊是毋是捌看過我寫个台語文，點讚來認同我个看法？

二、伊是毋是佮我仝款，關心台灣社會、文化，佮台灣語文个運命？

三、伊發過个訊息，是毋是多數攏是「有營養」个內容？

四、伊是毋是佮我有袂少共同个朋友？

我若擔心對方會誤解我是一个癡漢[tshi-hàn]，佇我發出邀請个同時，會另外寫一封私人批予伊，自我介紹，講明我个動機，請伊無相棄嫌，多多指教。

閣一點蓋要緊，毋通一睏對一堆生份儂發出邀請。因為網路真濟歹儂，會用即種方式去擾亂別儂，所以 facebook當局才會對即種行為特別感冒。這毋但 facebook 是按呢，所有个社群網站、email服務商，攏真嚴格處理即種代誌。