學台語文，愛骨力查字辭典，無分老師抑學生

咱欲研究台語（毋是指學術研究，是指以語文使用者个立場來深入學習），一定愛定定查字典、辭典。主要个字典，包括廈門音新字典、彙音寶鑑，主要个辭典，包括教育部臺灣閩南語常用詞辭典、台日大辭典。

以上除了彙音寶鑑以外，網路攏有。台日大辭典个網路台文譯版，有寡錯誤，利用个時，上好點入去原文掃描圖檔來確定。

舊版廈門音新字典（簡稱甘字典）

教育部台語辭典

台日大辭典

我看有寡老資格个台語文教師，罕得咧查工具冊，對方言比較嘛真生疏，嘛無綴時代進步，好好仔參考教育部个建議用字（佮伊个用字解析說明），干焦以家治會曉得个做標準，來糾正學習者个「錯誤」。結果只是無仝腔口、俗音對正音、勾破音（破音字），或者是教會慣用漢字佮教育部推薦用字差別个問題。

一篇成千字个全漢字台文，有才調唸甲字字正確个，我足罕得拄著。像教育部閩南語文章朗讀稿，教育部有揣儂來做示範錄音，每一篇難免閣有一兩字唸錯。所以我才鼓舞逐家愛骨力píng字典，這是基本訓練，真濟台文界个友志攏做袂到。

一直欠缺一本現代化个台灣泉腔字典，是大遺憾[uî-hām]。泉腔非常有文化深度，但是佇台灣變弱勢，真扑損。