我對民進黨總統初選民調方式个感想

民進黨總統初選民調，照民調專家游盈隆教授个解說：

『對比式民調的宗旨與目的,一言以蔽之,就是希望找出誰是民進黨最強棒,最有可能打敗馬英九的人,…』

即種宗旨目的，用另外一个角度來看著是：民進黨卡關心派出一个選舉大將來拚倒馬英九，重新執政；但是卡無關心揣出一个真正會凍帶領台灣人民行出光明路个頭儂。即點佇怹初選登記辦法嘛看會出來，只要交500萬，任何黨員攏會凍參加初選。

游教授閣講：

『…，而判斷誰是最強棒的標準只有一個,就是根據民意支持度的高低,而非個人主觀的好惡![唯一支持說]企圖阻撓或混淆自然真實民意的呈現,根本上就違反對比式全民調的宗旨與目的』

既然這是初選，著是隨儂自由搝[giú]票，君子之爭。無共爿个支持者，只要儂無用下流手段去抹烏對方 按呢著好，是按怎欲管儂按怎回答？

民進黨即種民調法，毋但害著濟濟支持个人民 霧sà-sà，怹家治嘛足驚國民黨會來創空[khang]，閣卡驚黨內無共爿个支持者 咧教家治儂一套回答方法。

一切攏是民進黨家治做得來个啦。一開始个動機著有私心，關心掌權[tsiáng-kuân]，大過關心台灣，毋才會創出即種莫明其妙个對比式全民調怪物，又閣欲指揮咱 著愛按怎、袂使按怎，實在是侮辱人民！

懇請各位台灣友志，毋通將民進黨重新執政、國會過半，當做口號來盲目支持，袂輸只要按呢，台灣著自然會出頭天，我毋信！

咱一定愛隨時鞭策即个飼袂啥會成儂[tsiânn-lâng]个反對黨，叫伊愛推出成樣[tsiânn-iūnn]个候選人佮政見，而且咱愛監督伊照品照行[tsiàu-phín tsiàu-kiânn]，隨時揬[tu̍h]破伊个私心！

閣有，民進黨候選人將兩岸關係挨推[e-the]予下一代來決定，即種無擔當个心態佮作為，無才調帶領人民，行出予中共拆食落腹个危機[guî-ki]，這著是怹想欲做台灣總統，峘度猶閣無夠个所在。