下昏暗學生个台灣戲曲社成立一學期舉行成果發表，演出山伯英台草橋相遇[gū]个一段折仔戲[tsiat-á-hì]，扮tioh真古錐，做了袂歹看。扑算比過去演布袋戲卡有成就感。傳統个布袋戲卡oh學，一方面閣無學後場，抑前場是靠一个主演个頭手師[sai]，卜予一堆學生攏sńg有夠khuì，真困難。今仔暗我坐佇台跤，看著山伯英台兩位tsiah大仙，抑兩个書僮hiah細隻，不止心適。
Suah戲了後，閣綴學生仔去學校對面看電影，先看「我的超人女友」，閣看 「新婚"奧"客」。劇情請讀者家治點連結去看一下，佇遮我著無閣介紹矣。（2023年補充：電影節目表連結更新。）
若準是我家治一儂，就袂去看即種阿tok仔做个通俗娛樂片。毋閣佮學生去看電影，是一種新經驗，而且，我最近開始塊注意「文化研究」即種學問，嘛有需要加接觸一寡大眾文化个素材。以下我只是先寫一點仔初步个想法，等以後真正對文化研究捌了卡儕，有機會才閣翻頭來寫卡深入咧。
「我的超人女友」个內容，是塊講一个本來著欠缺自我認同个查某囡仔，無意中予伊得著超人个能力，從此以後，伊有才調，而且嘛確實不斷利用伊即種超能力去救助世界，當做一種自我肯定个方式，袂輸是卜展威予過去看伊衰bái个儂看，毋閣，伊並毋敢真正將伊超人个新身份公開出來。伊个超能力對伊家治內心个空虛毋但無補所，顛倒予伊面對感情問題个EQ越愈[ua̍t-jú] tò-thuânn。真無采，即齣戲歸尾雖是大團圓，總是，咱感受袂啥會出來即个超人女性，有啥款真正个個人成長。只會凍向望伊最後發現个迄个自早著愛伊入骨个查甫儂，用彼來自外部死忠个愛，來kôo-kīng伊內在無平衡个心靈。
我毋知以女性主義个觀點，會按怎來評論即phō影戲。咁會批判講，即齣戲其實帶有一種「女子無才便是德」个男性沙文主義－－查某儂若得著能力佮權力，雖是表面上嘛會佮查甫儂共款（請比較「超人」系列个電影）做出保國護民个行為，但是其實伊根本會變成感情个低能者，隨時會因為情場失意來造成大災厄[tsai-eh]。
比較起來，「新婚"奧"客」就予我感覺情節个起落卡豐富，內底每一个人物攏有發展、長成[tńg-tsiânn]。最後，即齣戲猶原予男主角Karl表現出美國式个英雄形象，解決伊个事業、家庭佮朋友問題，佮女主角攬塊tsim，眾儂扑pho̍k-á喝咻[huah-hiu]。抑男配角Dupree變成一个真成功个「人生導師」，靠寫冊佮演講來佇社會上佮儂有比有並。毋知編劇佮導演是毋是加減仔佇塊扑枋彈柱[phah-pang tuânn-thiāu]，gé-sé美國社會迄寡出名个作者佮誠簡單著予姻鼓舞起來个天真群眾？
Comments powered by Disqus.