我塊讀國中，有一工下晡散學(suann3-oh8)，輕鬆矣，我著走去隔壁棟，無外久，雅雪佮另外一个同學來jiok4儂。伊手提排班表，認真盡責个面chiunn1共我講，今旦日輪著我掃便所，叫我愛轉去做空課(khang1-khue3)，我著順情應好。
以上是早起當卜精神晉前个夢。下晡去上課，一堆學生摃鐘過五分鐘才歸帆(kui1-phang5)入來，我問姻，講去勞動服務，拚掃。師範院校刁意(thiau1-i3)保留即種勞動服務个傳統，一般个大專罕得有。雅雪是阮學生，佇夢中變成佮我同學。
昨昏下晡我去太平國小共(ka7)參加講古比賽个學生鬥加油。看著姻个便所門邊有貼牌仔，寫講是叨一班負責个，想著家治卡早對國小到高中，攏真好命，毋捌掃過便所，我讀个班級攏毋捌予學校派去掃便所過。大學、研究所閣卡免講。干那大專集訓去成功嶺，益閣新兵訓練个時有掃過耳（我大專集訓佮做兵，除了出去支援(ci1-uan7)抑是落基地去斗六無算，攏總留佇成功嶺。即个大台中地區佮我嘛是真有緣啦。）
總是，對我即尾死坐活食(si2-ce7 uah8-ciah8)个烏肚蟲仔(oo1-too7-thang5-a2)放出來个污穢(u3-ue3)，攏是別儂塊共我拚掃，我愛共姻感恩，家治嘛愛tau7-tau7-a2放下畏a1-ca1个清氣相(siunn3)。驚畏(kiann1-ui3)，袂清氣；愛去做才會清氣。
Comments powered by Disqus.