提醒蔡英文：做大事業个儂，額頭愛開闊

古早有流傳一句面相[bīn-siòng]个俗語：「男天爿，女下顎。Lâm# thian-pîng, lú# ē-kok」。認為查埔儂好个面相是天爿（額頭）愛開闊飽滇[pá-tīnn]，查某儂好个面相是下頦[ē-hâi]愛圓潤（現代西洋審美觀，佮意尖尖个下頦，這咱古早感覺毋是福相）。

天爿飽滇，就身體理來論，頭殼內部个空間較大，予腦部會得充分發育，所以即種儂一般較有智慧，若是額頭崁崁[khàm-khàm]个儂，平均智商大概就較低，古早儂个經驗談毋是無根據个。

閣就人際心理來論，儂佮儂互動、講話个時，目睭對看，若是對方个額頭開闊、金金有光，較容易予儂產生一種信賴感，相對來講，若是崁頭崁面个儂，就予儂感覺較袂信靠--得，所以台語「崁頭崁面」就變做一種負面个形容詞，佮華語〔呆頭呆腦、楞頭楞腦〕意思差不多。

古早是男主外、女主內，所以才干焦強調男性个天爿。現代男女平等（理想上），查某儂佇社會上做大事業、佇政治上統領萬民个，不止濟。咱看無論男女，只要是做頭儂（領袖 líng-siū），頭額[thâu-hia̍h]攏真開闊飽滇，而且儀容个修飾上，也將額頭个頭毛捋[lua̍h]對後壁、抑是掰[pué]去雙爿，盡量將頭殼額仔展出來。

我看蔡英文个打扮一向真樸實[phoh-si̍t]，頭毛無電、也無留長，但是伊个頭殼形佮頭毛質，予伊中分个頭毛將額頭崁甲賰三角形，而且正爿个頭毛不時遮著正蕊目睭。

按呢做一个政治人物，實在毋是理想个造型，因為違反頂面所講个「天爿開闊」个原則。

蔡英文聰明、有能力，但是佇面貌方面一直無儂共伊提醒。伊到今選舉毋捌贏過，原因真複雜，但是無夠講究面貌，予民眾信心無夠，相信也是影響因素在內。