教典未收詞（一）

2023-07-30

教典未收詞01

常用詞：

1. 教育部
2. 臺灣
3. 臺語
4. 臺灣話

5. 閩南語

6. 雞鴨

7. 藥店（有收「漢藥店」）

8. 賣藥仔：[動] 1. 販賣藥品。2. 廣告藥品、健康食品等。 廣義是用來通稱電台的廣告時段，電台家己雅稱做「工商服務」。
   面友Shu-ren兄留言：『「賣藥仔」，阮講「報藥仔」』。

9. 健康食品（干焦出現佇「美國仙丹」的例句）

10. 松柏（仔）[tshîng/tsîng-peh(-á)]：松柏類的通稱。華語講「松樹」， 台語講「松柏（仔）」。目前教典無單獨收列「松柏（仔）」，但是「松柏」 有出現佇單字詞目【樠 miâ】字的例詞：「松柏樠」，可惜標音錯誤，伊標做 tshîng-pik-miâ，應該是 tshîng-peh-miâ 才著，可能是撰稿者對「柏」 字的白話音無語感才會按呢。台日典有包含「松柏」的三字詞、四字詞就有九个！

11. 覓厝 [bā-tshù]
12. 揣厝 [tshuē-tshù]：舊講法是「覓厝」，可惜「覓厝」目前較罕得有人講矣， 講「揣厝」的較濟。總是，舊講法較精密，若是本來無屬於咱的物件，是用【覓 bā】， 像【覓厝】、【覓食 bā-tsia̍h】、【覓頭路】、【覓錢】、【覓查某】； 屬於咱的物件，拍無去，才用「揣」。現代用法是將「揣」來包含「覓」， 動詞「覓」就失落去矣。【傱錢 tsông-tsînn】的意思是「要緊去覓錢」， 毋是「要緊去揣錢」，「揣錢」是本來就是咱的錢，但是 phàng-kìnn去，才用「揣」。

---

次常用詞（可能有罕用詞）：

1. 趕厝 [kuánn-tshù]：厝主要求厝跤搬走。佮頭前「覓厝」會使配搭使用。 例句：「厝主咧趕厝矣，咱著緊閣覓厝。」

2. 目光 [ba̍k-kng]：在來詞，指目睭正常正常，物件看會清楚。反義詞是 【目花 ba̍k-hue】（教典也無收）、 【青盲 tshenn-mê / tshinn-mî】。

   教典目前有收「目光」，毋過煞寫講是「臺華共同詞，無義項」。 我查重編教國典〔目光〕第一義是〔眼神〕，這台語是講「目神、眼神」； 〔目光〕第二義是〔指人的識見〕，這台語是講【眼光 gán-kong】也有講 【目識 ba̍k-sik】。 所以 ba̍k-kng 無應該歸類做臺華共同詞！

3. 變無步 [piàn-bô-pōo]

   說明：「變無步」佮「無變步」意思無啥仝。

   教典目前無收「變無步」，但是有收「變步」，干焦一个義項：「變通的方法。」 例句寫「代誌到遮來，我嘛無變步矣。」

   其實「無變步」有兩種意思，一種像教典所寫，一種是指「毋知變竅、不知變通」。 若台日典「變步」就有收三个義項，真完整：

   1. 第一義項是動詞，改變步數、做法；
   2. 第二義就是教典所收；
   3. 第三義是「有變竅、無變竅」彼種意思的「變步」，也就是會曉、袂曉變通， 這種意思的「無變步」同義詞是「無變通」、「無變竅」 （這兩个動詞就袂使替換入去頂段教典的例句）。

   我遮所列的「變無步」是指「想無變通的方法」，會使替換入去頭前教典的例句： 「代誌到遮來，我嘛變無步矣。」我認為這種講法較自然、捷用。

4. 凹窩 [nah/naih-o]

5. 塌窩 [lap-o]：佮「凹窩」是同義詞。

6. 輪鬮 [lûn-khau]：照抽鬮抑是某種分派方式來輪流。

7. 著鬮 [tio̍h-khau]：輪鬮 輪–著，就是「著鬮」。

8. 箭竹（有收「劍竹」）：【箭竹 tsìnn-tik】正音，【劍竹 kiàm-tik】是訛音， 華語分袂清楚「箭」佮「劍」才會寫亂去，但是音是無差，台語人綴咧亂， 但是台語無仝音啊！訛音通行起來，變俗音，收入教典也是無可厚非， 總是，無應該無收「箭竹」，都毋是無人講矣 koh-。

9. 破媌 [phuà-bâ]（維基詞典有收漢語官話詞「破麻」， 而且註明來自閩南語「破媌」）

10. 工商服務 [kang-siong# ho̍k-bū]