教典新詞內容撰稿者查網路資料的撇步

鋪出日 2023/07/12

作者 潘科元

7 分鐘閱讀

先查中研院閩客語典藏網「廈英大辭典、廈英大辭典補編、英廈辭典」整合查詢系統。伊的詞條無台日典遐濟，但是伊的釋義有時較詳細、深入。另外，補編有一寡詞，台日典無收著。
ChhoeTaigi 台語辭典⁺：
「kéng ê方式」點「相關–ê」，查著了後，會記得點「詳細」入去看，閣點下底「掀原冊」去看原冊圖檔，確認網路版無拍毋著音標（當然愛先學會曉看假名式音標），也無落勾釋義、例句等。特別注意其中「臺日大辭典」佮「臺日新辭書」的解說佮例句。
去「教會公報全文檢索網」佮「台語文數位典藏資料庫(第二階段)」揣看有用著這个詞的文章無？若查著，一定愛閣點入去詳細看伊的前後文來幫助咱建立語感（有時看著內文才發現根本毋是咱欲查的），較袂寫出龜龜怪怪的教典例句。
以上若攏無文例，會使閣查「台灣話大詞典」。先去 https://ebook.nlpi.edu.tw/register 免費註冊，才連去「公共圖書館數位資源入口網」，先登入，閣佇「電子資料庫」查詢欄拍「台灣話大詞典」才點入去查。

以上的查詢，攏先用拼音去揣看覓。一方面是其中有的文獻干焦有拼音，無漢字；一方面是教典官方提供予撰稿者的詞條漢字佮以上文獻所用的漢字真有可能會無仝。也愛注意用無仝腔口去試，主要是 ue/e、inn/enn 的差別上捷拄著。像「皮鞋」用 phue5-e5 查無，就用 phe5-ue5 去查。就準咱用某一種腔去查就有，也著閣用另外一種腔去試。像教會公報的文章，無仝作者，腔口無仝，咱用 phue5-e5 查會著 7 篇，閣用 phe5-ue5 就閣查會著另外 6 篇。
廈英典查詢網會使得用數字式教羅抑是數字式台羅去查，注意鼻母音，像毒品名，用 moonn5-hui / mooN5-hui / mouN5-hui 攏查有，但是 moo5-hui / mou5-hui 就查無。教會公報全文檢索網拄好倒反，愛用 moo5-hui 抑是 mou5-hui 才查有。台語文數位典藏網干焦會使得用 mou5-hui，袂使得用 moo5-hui，鼻音記號用 N 無用 nn。 ChhoeTaigi 的數字式教羅鼻音記號是用 nn 無用 N。