今仔日讀冊會(2014-11-12)，有先進提起「沐」字正爿个「木」迄徛[khiā]（直畫）袂使勾起來。
「沐」是三點水[sann-tiám-suí]，正爿是樹木个「木」字。若是按呢，就表示「木」本身袂使勾，所以「沐」佮其他一切有包含「木」在內个合體字攏袂使勾。
網路查著講是 1982 年前教育部標準字體有勾，以後規定無勾。另外奇摩知識+ 有儂（遜平）整理「木」字形演變：
『
1. 木字在篆書本沒有鉤，所有的木部字都沒有鉤，如【東、本、朽、朱、果】等字。
2. 木字在隸書中也一樣沒有鉤。
3. 直到2000年前左右，開始有了草書為了連綿快書，木字的豎直連到左撇再連接到右捺。
4. 又到1700年前左右，產生了楷和行書， 那時，楷的形態沒有一定的形，可鉤、可不鉤，隨人自由，但在行書而言，為連綿帶筆，是一定寫鉤的。
5. 今人喜考古，將鉤去掉，也未必是好事。 因為還有太多與古人不同的字和意，考古不完，糾正不完，問題既然永遠解決不完，何必如此多事。
』
阮細漢佇學校所學著个「木」就是有勾个，我毋知影教育部已經規定無勾 32 年矣。阮有淡薄仔楷書書法基礎个儂，感覺無勾寫著袂漂撇。
上明顯个就是「月字爿 gua̍t-jī-pîng」（服、朦、朧、朔、朗、期、朝、望……）佮「挑肉爿 thio-jio̍k-pîng」（肌、肢、肺、胎、脂、肪、胖、肚、肥…）字形分寫即項新要求，我嘛無咧管伊。教育部漢字專家即種做法，是自我作古，否定兩千來兩種字爿寫法合一个傳統，現時漢字文化圈个中國、日本、韓國攏照傳統，獨獨中華民國漢字專家學問蓋倒全東亞，創出即種分寫个規定。
其實「月字爿」个字真少（康熙字典收84字），「挑肉爿」个字是十倍濟（康熙收826字），當做字爿來用个時，迄个ㄇ形个外殼因為變足狹，寫兩筆橫畫比寫一點一挑較媠濟咧。結局伊按呢一下改，迄八百幾字攏愛改，而且改甲足歹看。印刷字形、電腦字形有照教育部即項新規定去設計个，其實也無濟。
最近 Google 真好心，設計一套漢字足完整个烏體字型「思源黑體」，閣有分台灣體、中國體、日本體、韓國體，免費予全世界利用，就是台灣體即个所在佮儂寫法無仝款，閣真歹看。
話講倒轉，咱台語先賢將即个字爿號做「挑肉爿」其實會使配合即種新規定來教，提醒囡仔即个字爿个尾筆是「挑」毋是橫畫[ue̍h]。但是即馬个「國語文」老師是會曉用台語智識來教「國字」--nih？
Comments powered by Disqus.