文言變調

真久無寫物件，今旦日來加減hiù幾滴仔水。台語个變調不止大複雜，連阮自細漢講台語个，有時嘛會花去。日本時代迄寡日本儂，有出台語冊个台語專家，姻講出來个台語，聲調方面，毋知會予台灣儂掠包袂？

日常口語个變調有一套規則，抑用台語讀古文，另外有一套，雖然是以口語个規則做基礎，真儕時陣會使共伊翻做口語，套用口語个變調規則來讀文言文，毋閣愛閣加添一寡原則，將「變調組」切予卡幼。切予卡幼个結果，著是讀本調个字會卡儕。親像及物動詞後壁接超過一字个受詞个時，若是口語，及物動詞是攏愛講變調，親像「孟子見梁惠王」若是口語，是 bīng-tsú# kìnn liông-huī-ông#；毋閣讀文言个傳統，大常是唸做 bīng-tsú# kiàn# liông-huī-ông#。

台語界个人士，有語言學素養个，卡無關心「漢文」；抑關心漢文个，無啥學術素養，致到[tì-kàu]即方面个問題一直無儂研究个款。