新俗語【買外國毒蛇放生——假功失德】

台灣俗語有一句孽詰仔話【買鹹魚放生——毋知死活】，鹹魚當然早就無命矣，閣買來欲放生，咁毋是真戇？

咱看一寡有名望个宗教人士，用救苦護生來積功累德个名義，向信徒題緣[tê-iân]大條善款，刁工去共專門賣【放生鳥、放生龜、放生魚】个生理儂買一大堆外地種个動物，濫糝糝、粗魯魯做一睏放入山、放落海。

結局，遮个外來動物，毋是適應袂去，艱苦死，就是活落來擾亂著在地原本个物種基因佮生態平衡，這毋但是戇，閣較是罪過[tsuē-kuà]。

其中甚至有儂大量放生外國種个大尾毒蛇入去台灣个內山！這攏毋是放生，是咧害生、殺生，破壞生態。

佇遮欲撰[tsuān]一句新俗語【買外國毒蛇放生——假功失德[ké-kong sit-tik]】。