新版个台灣羅馬字

POJ、TLPA、「通用」，即三大派 sann 拄水 [tú-tsúi]，佇官方最近个發展，就是「通用」=个 tsik-táu^１--去，偆 POJ 佮 TLPA。

2006-09-06 表決个結果，聲調記認採用 POJ 个調號。抑 POJ 特殊个o 正爿頂角迄點（有儂後來共號做「葫蘆點」），放棄； o͘ 改用 TLPA 个 oo。閣再，鼻母音上標 ⁿ 改用 TLPA 个普通小寫字 nn。POJ 个 ch ，亦就是 TLPA 个 c，攏 hìnn-sak，改做 ts；送氣个 chh/ch 改做 tsh。

按呢著愛 púe-hūe 十幾年，台灣頭儂 háu 厲害，台灣百姓足無奈。

我寫即篇，扑算是「社會各界」對官方即項決議个第一篇半公開評論，若有儂卜講我是來亂个，我亦 hm̍h-hm̍h 據伊講。總是，儂我即篇是用最新版个台灣羅馬字寫个，實拄實著是我這石仔塊共 in 大石 sann-kīng 个鐵干證矣喇，汝講看有影無？制定委員 in 逐个家治 to 攏 iáu未開始試用即套符號咧，我著熱phut-phut 共採用矣。

即種決定，是眾儂 tshui-tshiâu，真無簡單 tsiah 相讓掠中和 [lia̍h-tiong-hô] ² 个結果。母閣古早儂有塊講，一好佮一gâi，無兩好 thang 相排。即馬按呢創出來个系統，有一个不止著力[tio̍h-la̍t]³ 个問題，就是一个音節个平均長度，又閣「創歷史新高 [tshòng li̍k-sú sin-ko]」矣～～。一个聲母，上儕著愛用甲三个羅馬字母來寫 (tsh)--無--打--緊，後壁个鼻母音又閣秤錘拖尾，另外用兩个字母來表示。Tì-kàu 有tang時仔，咱愛用甲九个字母來寫一个音節，親像 tshiaunnh、tshuainnh。好佳哉 he 是足罕用个，毋閣若千不幸[tshian-put-hīng] 予咱用著，又閣愛排版佇漢字个頂峘做注音，he 就哮疼[háu-thiànn] 囉。

nn 表示頭前个母音愛加鼻音。這有三項大問題，第一：符號長；第二：明明無佔呼音時間，suah 佇符號上 lò-lò 長用共款个字體紲落去寫。視覺佮心理子午沖，歹學習（即點來論，上好學習个是 IPA 直接佇母音頂峘加 ~，閣來是 POJ， TLPA 上差） 。第三：定定會佮 m 糊混 [hôo-hūn] 去。

閣再，葫蘆點毋 ti̍h，即點我卜講寡 koh-iūnn 个想法，這是我个私奇話 [su-khia-uē]，請毋通相怪 [sann-kuè]。為著即个葫蘆點，久年來，支持者所受个著磨 [tio̍h-buâ]，he 是無凍講起（反對者嘛了袂少工佮 in pué 手面），路尾 Unicode 總算肯共承受起來。M̄-kú neh，即个 Unicode 个 combining dot above right，毋但佇技術方面（輸入、顯示、資料 tshiau-tshuē 各方面）歹剃頭，學習上嘛無 thang 好，因為傷細點，傷無食目 [tsia̍h-ba̍k] 矣。捌有一寡學生仔一篇文章看歸晡，煞攏無注意著即个「胡蠅屎點」是符號个一部份。（我講「胡蠅屎點」，並無歹意，請毋通誤會。我只是去想著「胡蠅屎痣 (hôo-sîn-sái-kì)」即个名詞，共挓來套用。佇遮是塊表示講，「葫蘆點」定定會予儂看 tānn 做是紙頂个 lah-sap點。）

來看偉大个 Douglas 牧師佇伊 1873 年出版个《廈英大辭典》按怎印即个符號：