汝我伊

汝[lí]、我[guá]、伊[i]，即三字卜做伙講（口氣愛頓一下），一字一字愛講本調，前兩字無啥議論。「伊」就真歹剃頭，真儕儂已經本調、變調無分，攏讀做中平調去矣。照講「伊」个本調是第一聲高平調，變調 tsiah 是中平調。

我調查過个老儂，北部个、澎湖个、綠島个、閣有阮父母，攏總分會清楚。毋閣現時中年五六十歲以下，愈來愈儕儂分無路來。連帶影響著隨前變調輕聲，嘛煞糊混[hôo-hūn]--去。

以下若出現數字，是三調階个調位記法。11上kē、 22是中平調、 33是高平調。

舉例：「鄉土文化咱愛好好仔了解--伊、熟視--伊、重視--伊」。佇遮，「伊」愛講輕聲。汝个腔口若一律固定kē調輕聲，親像台南市儂，就是講 liau33 kai31 i11, sik10 sai22 i11, tiong11 si22 i11，「解」「視」「視」本調，「伊」固定kē調 11。毋閣台灣多數地區个腔口是 liau33 kai31 i11, sik10 sai22 i22, tiong11 si22 i22。前兩組卡無問題，毋閣「重視--伊」，迄工教一个卜去參加演講比賽，台語基礎真好个學生，伊卡唸 to 是 tiong11 si11 i22。按呢煞變做無一字本調。伊頭殼內个台語系統，已經將 i22 當做是本調矣，按呢分析起來，「重視」兩字攏變調，「伊」本調，這是一般非代名詞做受詞个變調規則。

問題是，「熟視--伊」，伊閣會曉講 sik10 sai22 ii22，照正確个隨前變調輕聲个規則來變。所以替伊按怎解說 to 袂通。唯一會通个分析分式，可能是「重視伊个問題/需要…」即種句讀[kù-tāu] 不時聽會著，佇即種句讀，「重視伊」三字攏愛讀變讀。相對來講，「熟視--伊」通常按呢就煞矣，後壁無閣直接紲[suà]啥麼話落去，所以「熟視--伊」伊講會準，但是「重視--伊。」就講袂準。

（另外一種解說方式是 tiong11 si22 i22，有連紲兩个 -i22 i22，一模一樣个韻母佮聲調，可能會出現 dissimilation（異化）个音變，予姻个聲調有參差[tsham-tshi]，變做一kē一峘，會卡好講）

即款物件，卜講予目今个台語儂理解，真 oh。