《新選笑談俗語歌》幾个仔疑難試解

台灣民間說唱文學歌仔冊資料庫網站（以下簡稱「歌仔冊網」），有註解一phō《新選笑談俗語歌》，佇內容概述有寫講：

本書以台灣總督府圖書館輯《台灣俗曲集》版1841年出版《新選笑談俗語歌》為主，用吳注牛津本道光己酉(應作「乙酉」，1825年)年新鎸、杜氏本(道光辛丑年(1841)新鎸)參校。

其中，台灣俗曲集所收个版本，實際冊名是《新鮮俗語歌》，這佇台灣圖書館網站揣會著原冊圖檔（著愛有借書證）。若是道光辛丑年个版本才叫做《新選笑談俗語歌》，這佇台大歌仔冊資料庫揣會著楊雲萍先生个收藏。以下書影是採用台灣俗曲集內底个版本，圖片來自台灣圖書館電子資料庫，所以右上角看會著舊底中央圖書館臺灣分館个浮水印。

即phō歌仔冊，雖然有吳守禮、杜建坊、施炳華諸位先生費心勞神落去整理、註解，猶原有真濟所在咱閣唸無、看無。阮囡仔儂徛佇三位巨人个肩胛頭頂，無意中有閣發見幾jiah仔新光景，佇遮筆記落來，敬請各位參考、指正。

（請注意，即份作品內底有限制級个描寫。）

第一頁內文第三tsuā：「振不丕」可能是 tsǐn m̄-pher（盡毋胚），「胚」是料想、預想个意思，就是台日典所收「無胚 bô-phe/phue」、「無派胚 bô-phài-phe/phue」（華語〔沒想到……〕）个意思。風騷嬸講話較粗魯，對女主角講，「死鬼仔 sí kuí-kánn」（死查某鬼á），真想袂到是汝來，「拙惡見 tsuah oh kìnn」，遮爾僫得會通見著汝，汝真罕行--neh！

第2面 尾tsuā有寫「八死長　八死短」，迄个「八死 pueh-sí」是泉州常用語，「見笑、羞恥」个意思。「折靣皮」就是「拆面皮 thiah bīn-phêr」。按呢咱閣看「秋九溜」，我就憢疑作者是欲寫「秋秋濟 tshiu-tshiu--tsè」（tsè是「一下 tsi̍t-ē」合音），是華語〔羞羞臉〕个意思，「九」可能是疊字記號个錯版。下圖是吳素霞藝師整理个劇本《葛熙亮》「辨真假」內底一頁，真淑講：「姿娘人 趁人卜上京赴試，不識八死真真啾啾節（m̄-pat pueh-sí, tsin-tsin tshiu-tshiu--tsè）。」

本歌仔冊第3面「小仁人」，杜、施兩位先生改做是「少年人」，但是南管戲个口白聽會著「siáu-lîn--lâng啊！」，這佇李祥石藝師口述劇本、吳素霞藝師整理个劇本，攏寫做「小人人」，意思是「儂足歹勢、足見笑啦！」，閣有講「畏小人 uì-siáu-lîn」是「驚見笑」个意思（台日典寫做「畏羞人 uì-siáu-jîn」）。本歌仔冊「小仁人」意思完全呼應頭前个「八死」、「秋九溜」（「秋秋濟」）、「拆面皮」，所以並毋是「少年人」个錯版。下圖是《葛熙亮》「辨真假」其中兩頁，中央个所在有講著「小人人」、「畏小人」（「小人人」我本來是聽做 siáu-lîn-lâng，今我感覺是 siáu-lîn--lâng 較著，也就是 lîn 唸本調，lâng 唸輕聲，若是毋著，懇請賢達指正）：

另外，本歌仔冊第 3 面第 5 tsuā「就了絕　袂啟声」，歌仔冊網根據即版本採用「啟」字，較無妥當，應該用道光辛丑年版寫「袂做声」。

閣有，第3面第 6 tsuā「因老母　驚厥厥　変身悌」，歌仔冊網註解「悌」講：「牛津版作「[十+弟]」，疑是「挮」字，躺靠之意。」我看這應該唸 thui（推，推拿按摩之意），作者可能是欲寫做「挮」，也可能是欲寫借音字「梯」，「変」是「遍 piàn」个借音字，「変身悌」三字唸做 piàn-sin thui。怹老母來到tè，看著伊吊脰（挂傀儡）無成，吊索仔个「承塵」（剩陳）斷做幾塊，伊跋落塗跤，摃一下死死昏昏去，怹老母大著驚，趕緊扑救伊，規身軀緊共伊 thui-thui咧，所以才講 piàn-sin thui。

第4面第 2 tsuā，「无食飯　假印[氣口]　无穿衫　假調啄」。「印[氣口]」即个詞，歌仔冊網標音是 ìn-khuì，恐驚走爭去矣，這是兩句有押韻个俗語：「無食飯，假 ìn-e̍rh；無穿衫，假 tiau-terh。」ìn-e̍rh，漢字可能是「應呃」，咱台灣一般腔講「扑呃 phah-eh」，台日典也有收 ìn-eh（漢字伊寫「應噎」）；tiau-terh，咱台灣腔是講 tiau-tah，也有講 tiau-tat，台日典攏有收，寫做「彫搭」。「穿插彫搭」、「粧去不止彫搭」就是穿插、打扮真 pih-tsah、好看个意思。按呢，「無食飯，假 ìn-e̍rh；無穿衫，假 tiau-terh。」就是雖然無飯通食，也假做食真飽咧扑呃个形；無好衫通穿，外表也假做 pha-lí-phá-lih 个款。台日典無即句押韻俗語，但是有收一句類似个：「無食 假thóo呃，無穿 假tshiau-tshi̍k。」（台日典下冊p.95）

洪惟仁教授來賜教，寫講：「若漳eh~泉erh，本字著毋是「呃」，也毋是「噎」。應該是佮「雪」共韻个字。目前揣無本字。大概是擬聲詞變來个，無字。」

第5面第 2 tsuā「使暗行」歌仔冊網標音做 sír àm-kiânn，這應該是三字套語詞 sái-àm-hīng，就是用無光明个小人步數陷害儂个意思，台日典上冊p.547有收，台日典閣有收四个同義詞：使暗步、使暗毒、使暗箭、使暗針，遮个詞所用个動詞「使」攏是唸白話音 sái。

第5面第 8 tsuā「獨睡床」歌仔冊網標音做 to̍k-khùn-tshn̂g，即个「睡」字無應該訓讀做「睏」，因為閩、台語以前確實有「獨睡 to̍k-suī」即个詞，台日典就有收「獨睡床 to̍k-suī-tshn̂g」(下冊p.476），也有收「吞獨睡丸 thun-to̍k-suī-uân」（下冊p.389），意思是家己一个睏，不近女色。

第5面第 9 tsuā「縐紗巾」歌仔冊網標音做 kiuh se-kun，可能無妥當。「縐紗 jiàu-se」是一種高級綢料，遮應該標做 liàu-se-kun（第一字是第三聲）。台日典上冊p.734有收 jiàu-se（漢字伊寫「抓紗」），例詞就有「jiàu-se-kun」。

第6面第 5 tsuā「伊看見　就搶奪」，歌仔冊網「奪」字標做 the̍rh 有問題，「搶奪」即个詞台日典有收四音：tshiúnn-tua̍t、tshiónn-tua̍t (漳浦）、tshiúnn-te̍h、tshiúnn-te̍r（泉），最後迄組 tshiúnn-te̍rh 就是本歌仔冊佇遮應該唸个音。《當代泉州音字彙》「奪」就是收兩音 tua̍t、te̍rh。

即面用各種動物來形容人類交合个姿勢，我攏看無。

第8面 前幾tsuā咧講因為房事無站節，致使帶身命，請先生來派藥方，有提起幾若種漢藥名，第四tsuā 第二句「生仔[月+衣]」，杜先生《歌仔冊起鼓》p.144改做「生仔膿」，歌仔冊網改做「生仔儂」，也就是將「衣」字看做是「農」个簡體字「农」。不而過，在我看，作者確實是欲寫「月+衣」毋是欲寫「月+农」，伊是欲唸做「衣」字个白話音 ui，即三字就唸做 sinn-kánn-ui，就是指「囡仔衣 gín-á-ui、胎衣 ther/the-ui、thai-i/ui」，華語講〔胎盤〕，漢醫用來做藥，藥名是「紫河車」，西藥也有「胎盤素」。本歌「生kánn-ui　取頭胎」，就是先生交帶講「生囝ui」著特別取頭胎嬰仔个較有效。