《台灣限制級俚諺語》作者：潘榮禮，2005年，前衛出版社。
請注意：即本冊雖罔也是有價值个語言文化記錄，總--是，無適合用做一般个台語教材，會予儂批評講是教歹囡仔大細。
2004年，新加坡外長楊榮文佇聯合國大會，歹聲嗽批評台灣獨立个傾向，致使咱外交部陳唐山部長唱[tshiàng]倒轉：「新加坡像鼻屎大个國家，扶[phôo]中國个lān-pha，耀武揚威」，引起社會議論紛紛，一時間，LP 啦、PLP 啦，煞變做時行話，儂儂愛講！煞無啥儂閣去關心新加坡按怎傷害台灣个主權。
作者因為即層事件，才寫出即本冊，收集、解說真濟粗俗閣有力个台灣俗語。條目个台語漢字有講究，總--是佮後來个教育部用字koh樣，音標採用教羅。註解佮例句攏寫華語，較無彩。
有請 L.C.C. 畫袂少出神好笑个插圖。
作者較注重氣口有力，較無致意俗語个修辭技巧，比較起來，許成章先輩所收个限制級俗語就較巧路。
佇即本冊我有學著「挨石磨 e tsio̍h-bō」，除了正常个意思以外，也暗喻女同性戀个性行為。本冊寫講：
『女人同性戀都是 0號對 0號，有孔無榫只好用挨石磨，那樣慢慢的挨，慢慢的磨出火辣辣的慾火。』
按呢解說，我想，無到角[kàu-kak]。石磨有 頂砘[tíng-tún] 佮 下砘[ē-tún] 兩塊相疊[tha̍h]，但是即兩塊大石毋但有空，也有榫，彼榫就是「石磨仔心」，是一支圓鐵枝，一半插佇 ē-tún 中央个空裡，捅一半出來，才閣用 tíng-tún 中央个空對予準，疊起去，按呢石磨仔才磨會振動。這就是比並兩个女同性戀，靠「角車 kak-tshia」（仿个陽物）咧行[kiânn]淫慾仝款。
以上，敬請指正，勞力。
Comments powered by Disqus.