即擺選舉，票開出來，儂儂攏講真意外。按呢，到底台北市柯[Kua]、連對決个選情，有影響著全台灣無？這至少有三種看法：
- 毋是柯文哲个影響，是國民黨2008年到今做得來，自然个下場。
- 柯文哲有寡影響。
- 柯文哲救著民進黨。
我看第 1 點較無夠力。雖然評論者有提 2005 年底三合一選舉，民進黨大敗个情形來比並，怹解說講，若執政黨做了大失人氣，自然就會按呢。不而過，民進黨根基無在，容易水崩山，這是較合理；啊是按怎國民黨个勢力遐大，而且閣有民調顯示樂觀个數字，結局猶原塗～塗塗？
台中本來民調只是小贏，結果大贏，桃園本來民調是大輸，結果煞小贏。可見有民調方法問袂著个族群，出來投票，改變選情。其中可能有真濟就是認同柯文哲理念，閣有支持學運、社運个新生代。怹對權貴徹底反感，看著台北个情形，將心情反射轉來在地个選舉，積極行出來投票，才有今仔日个成果。
連勝文是絕對个權貴子弟，相對來講，柯文哲是一个靠家己雙手建立事業，閣完全無倚靠舊勢力，顛倒在野个政黨愛來倚靠伊个政治素人，若毋是伊佇台北帶動風潮，台中、桃園有可能按呢反盤[píng-puânn]，予民進黨得著選舉有史以來上大个勝利？
所以我看第 2 點應該是有。若第 3 點就愛閣較濟資料來證明。
但是柯文哲佇競選期間，表示出肯定獨裁者、無關心台灣主體性、對轉型正義 無知、無感个言論，這對台灣將來个從政者一定會有不良个示範作用。
最後閣補充一點，照講連勝文已經大敗啦，咱無應該閣批評伊啥乜，但是怹老爸煞出來罵講，馬英九愛負上大个責任。按呢咱嘛是愛講--一句：連戰無顧著政治倫理，硬㧣[tu]伊迄个完全無資歷个寶貝囝出來選台北市長，這咁無帶衰著國民黨佇全台灣个選情？連戰閣好意思罵別儂？國民黨全體咁毋免好好仔檢討即个榮譽主席？
Comments powered by Disqus.