本地在來，活lìng-lìng、勇khiàn-khiàn个活物[mi̍h]，會凍佮環境共生共榮。總是，因為tù袂椆外來毒龍个刣扑剉[thâi-phah-tshò]，煞死歸甓[phia̍h]去，這號生態个劫數，需要政府人為个介入，設法來復育[ho̍k-io̍k]在地个物種。
語言、文化个復育亦是一理[it-lí]。
復育語言个法度，親像復育物種共款，是多元、多層次个。其中一項是新語詞个擬定[gí-tīng]。
人類語言个歷史毋但幾若千年，毋過最近一百冬个新事物、新名詞，親像原子彈爆發，核子[hi̍k-tsú]連鎖反應个數量。凡若創造新詞个跤步綴儂無尾tsuē个語言，半暝著會予家治儂拖去墓仔埔種hìnn捒。世界逐所在，一个一个在地个弱勢語言，就按呢，隔轉工著無看見儂影矣。
Chocolate，扑算是清朝尾著引進个物，閩南、台灣攏音譯號做tsi-ku-la̍t（佮香港个「朱古力」應該是共來源）。閩南到今[tann]閣有塊講，台灣已經失傳。Tsi-ku-la̍t，日本時代个文獻（辭典、台語教材）有凍看，現代新編个辭典（親像《新編華台語對照典》（以下簡稱《華台典》）有凍查，總是，目今个社會普遍無儂知。台中有一个台語文研究會，一陣儂佇遐討論歸晡，內中有歲儂毋是無，毋過攏無儂知影tsi-ku-la̍t。
用紙共薰草捲起來，做成[tsiânn]細枝薰，卜定[poh-tiānn]亦是近代才有个。彼即馬叫做薰枝[hun-ki]，《台日典》無收hun-ki，但是有「枝仔薰」[ki-á-hun]（伊漢字寫做「枝仔煙」）。即个名不止心適，予儂通想著「枝仔冰」，攏是使用共款个構詞法－－歸枝歸枝个薰、歸枝歸枝个冰，「枝仔」个「仔」即个「小稱詞」，表示迄个「枝」是細ka枝仔，無大枝，抑̆(iah)中心語「薰」、「冰」囥佇後壁，按呢結成[kiat-tsiânn]三音節詞「枝仔薰」佮「枝仔冰」。
《台日典》有收「枝仔薰」，無收「枝仔冰」，但是有收「雞卵冰[kue-nn̄g-ping]、芎蕉冰[king-tsio-ping]、芎蕉霜[king-tsio-sng]」，攏是hiàng時 ice cream个新名詞。（阮細漢塊講「雞卵冰」佮ice cream無仝。）
檢采「枝仔冰」比「枝仔薰」个講法卡路尾出現，佇《台日典》个時代猶未時行起來，所以《台日典》無收。毋過，發展个結果，變做「枝仔冰」有留落來，抑[iah]「枝仔薰」扑算著失傳去矣。總是兩个名詞有一貫个表現法運作在其中，儹！
【冰棒】是「枝仔冰」，按呢【棉花棒】台語按怎講卡好咧？我毋捌聽儂用台語稱呼迄種物件過，有太儕已經佇台灣通行幾十冬个物件，攏是按呢，無儂要緊欲共號台語名（親像【小籠包】、【燴飯】），有儂號，嘛無儂綴[tuè]，袂興[hing]。咱欲做台語个復育，其中一項事工，著是愛參考台語舊底著有个構詞法，來擬定[gí-tīng]新名詞，稱呼新事物。上無愛先有儂共號名，才有可能做推廣[tshui-kóng]。
咱若將【棉花棒】直接翻譯做「棉仔棒」[mî-á-pāng]，無理想。因為「棒[pāng]」對台語來講，主要是做武器，足粗足大枝，若欲指迄號細項物，袂合[ha̍h]。卡早我捌共好朋友建盛講過「棉仔枝」即个我號个名，一講伊著聽有，我真歡喜。頭拄仔我去查《華台典》，無胚[bô-phue]伊嘛是按呢寫。即種號名个法度，主要是按照華語个構詞法，將字眼改換做台語个講法。
毋過，我即陣閣來考慮即个問題，若是照頂面「枝仔薰、枝仔冰」个構詞法來創造，著愛講做「枝仔棉」，佮「棉仔枝」前後字對調。
就構詞法來論，講「枝仔棉」，會使佮「枝仔薰」、「枝仔冰」相[sio]會通，予即種古錐个台語構詞，通生湠濟濟。
抑[iah]若講「棉仔枝」表面上有成台語「棉仔紙」个講法，總是，「棉仔紙」是一種「紙」；「棉仔枝」並毋是一種「枝」。但是就推廣个策略[tshik-lio̍k]來論，講「棉仔枝」因為卡倚華語，凡勢社會卡好接受。閣再「棉仔枝」个「棉仔」對應華語【棉花】有卡精確，抑「枝仔棉」个「棉」意思卡闊。
若是「枝仔棉」成做通行个話，咱thang設想講有生理儂欲鼓舞儂買一款新上市，棉仔特別軟、特別高級个枝仔棉，伊著會使共號做「枝仔絨」[ki-á-jiông]。毋過，講到遮，著親像塊講bàng-gah矣，干那有可能出現佇「準有影」(virtual)个台語文化網路國裡。
「枝仔薰」、「枝仔冰」即款佮華語各樣[koh-iūnn]，有特色个台語結構，直透tàm-suê，失去孳生力[tsu-sing-li̍k]，儂袂去想欲用伊來創造新詞。親像「大麵炒、米粉炒」按呢，現時逐家攏卡愛講「炒麵、炒米粉」矣。
古早話予咱扑毋見[phah m̄-kìnn]，現代物又閣無儂共號名，著準有少數儂共號名，欲共播揚出去，除了一喙傳一舌个原始步數，嘛著透過文字，效果才會大。干那有聽佮講个台語，無可能佮聽、講、讀、寫四項tsiâu-tsn̂g个華語、英語、日語平坐徛。可比是一跤一手、半身不隨个儂，按怎叫伊佮跤健手健[kiānn]、四肢健全个儂走相jiok？
台灣政治、文化、教育各界个頭儂，有太濟儂塊反對台灣母語个讀寫教育，怹主要个意思是講，「母語教育，只要用自然閣輕鬆的方式，踮厝裡予老母來教囡仔聽佮講著好，無應該創創彼無儂看有个奇怪个拼音佮文字，連老母都看甲花翱翱[kô-kô]，按呢即款母語教育有啥意義咧？」
請問：是按怎台灣̆家長會看無台語拼音佮台語漢字？究真，這是統治者長期迫害台語文化，連教會內个羅馬字聖經嘛共儂沒收[bu̍t-siu]毀hìnn-sak，閣卡免講予台灣儂接受正式完整个台語文教育，才造成即號現代社會無應該有个現象。致到當今台灣儂普遍冊攏讀誠峘，煞全全「母語文盲」－－無才調讀寫父母話个青盲牛。
中華民國咁毋是一个文明開化个國家？因何這个所在多數个大儂，連讀寫母語个基本能力都無，按怎袂見笑？按怎袂怨嘆？有佗一个先進國家个人民像咱遮衰bái？即馬咱欲用正確个法度來教育下一代，煞顛倒予迄寡政治鱸鰻、文化草包，將怹家治个罪惡所造成个變態个現象，當做袂使實施台語文教育个正當理由。這咁有公理？遐个儂个天良佇佗位？
（2009-08-14/15大修改，佮下跤个舊錄音有出入矣）
Comments powered by Disqus.