歌詩贈送方寶玉同學

阿里山中查某囝 A-lí-san tiong tsa-bóo-kiánn
寶玉是伊漢字名 Pó-gio̍k sī i Hàn-jī miâ
落山讀冊著拍拚 Lo̍h-suann tha̍k-tsheh tio̍h phah-piànn
追求理想向前行 Tui-kiû lí-sióng hiòng-tsiân kiânn

小小年紀志氣懸 Sió-sió nî-kí tsì-khì kuân
無人比伊愛台灣 Bô lâng pí i ài Tâi-uân
體力精神攏充滿 Thé-la̍t tsing-sîn lóng tshiong-buán
台灣一周伊行完 Tâi-uân it-tsiu i kiânn uân

台中來讀台語系 Tâi-tiong lâi tha̍k Tâi-gí-hē
認真學習無問題 Jīn-tsin ha̍k-si̍p bô būn-tê
排球系隊好姊妹 Pâi-kiû hē-tuī hó tsiá-bē
擁護隊長伊一个 iòng-hōo tuī-tiúnn i tsi̍t-ê

目睭迷人大大蕊 Ba̍k-tsiu bê-lâng tuā-tuā-luí
少女Sayun真古錐 Siàu-lú Sayun tsin kóo-tsui
詩文才情有智慧 Si-bûn tsâi-tsîng ū tì-huī
祝汝幸福永相隨 Tsiok lí hīng-hok íng siong-suî