正港台奸

連戰閣走去中國，佮中共頭儂攬攬抱抱，講台灣過去是「麻煩製造者」，意思是罵咱毋肯恬恬予中國蹧躂、毋肯乖乖予中共草踏[tsháu-ta̍h]。

連戰怹阿公連橫（連雅堂）本是台灣儂，有寫過兩本台語研究个冊（伊用舊漢學个智識對台語本字个考證 譀譀--仔，缺欠語言學嚴謹个根據），閣用漢人史觀寫出大部[phō]冊《台灣通史》（內底真濟錯誤）。

但是連橫伊癮[giàn]食鴉片[a-phiàn]，甚至無顧天良，1931 年佇御用報紙「台灣日日新報」發表「阿片有益論」，支持總督府賣阿片毒害台灣儂，講阿片對咱有大好處，目金儂咧講青盲話，引起台灣智識份子不目[put-bo̍k]。連橫佇台灣無法度閣徛起，姑不將，綴怹囝連震東過去中國，投靠國民黨。

連震東戰後才𤆬怹囝連戰搬轉來台灣，做國民黨个代表，「劫收」台灣。台灣百姓輕視怹，叫連震東即種儂「半山仔」，因為怹利用一半台灣儂、一半唐山儂[tn̂g-suann-lâng]个身份，幫助國民黨宰制台灣，有種種特權利益，享受不盡个榮華富貴。吳濁流佇《台灣連翹》冊裡形容連震東是「半山派中的陰險的策士」。

連戰青出於藍，愈老愈奸，伊即種出賣台灣予中共个行為，已經毋是「半山仔」會得形容矣，著愛叫做「正港台奸」。

台語形容詞「正港」个本意，是指「對商港正式進口个正貨，不是走水貨，毋是仿个」。

台灣諺語：「越奸越巧越貧窮，奸奸巧巧天不容」[ua̍t kan# ua̍t khiáu# ua̍t pîn-kiông, kan-kan-khiáu-khiáu# thian# put iông]。是按怎連家一代比一代愈奸巧，煞愈好額？天公伯--仔咁是飛去瑤池度長假，真久無咧插[tshap]代誌囉？咱遮个烏肚蟲仔著較巴結咧。

阮太祖食阿片，傢伙敗了了，規家口悽慘落魄，致使阮阿祖去予儂招，到阮阿公千辛萬苦，才閣起家[khí-ke]。鴉片个代誌毋是字紙个歷史，是阮家族个血淚史。