「歹年冬，厚痟儂」[Pháinn nî-tang, kāu siáu-lâng]，即句出名个俗語，其實有伊深刻个內涵－－生理會影響心理。年冬是指收成，年冬若䆀[bái]，發生饑荒[ki-hng]，百姓腹肚枵餓[iau-gō]，身體袂堪得，儂个精神著會連帶出問題，產生幻覺佮各種心理異常。
但是咱个社會發展甲遮複雜，即句俗語著愛重新解說，楦闊[hùn-khuah]伊个內涵。「歹年冬」，變做是指社會價值觀混亂，而且 富--个 富拄天，窮--个 窮寸鐵[pù--ê pù-tú-thinn, kîng--ê kîng-tshùn-thih]；「厚痟儂」，是指變態、痟亂个人物、事件佇媒體一直puh--出來，成做[tsiânn-tsò]眾儂注目个話題。
共同活佇即个社會，凡勢咱每一个儂，心肝底攏有陰影佇咧－－恐驚家治有一工嘛愛變做新聞中个痟儂。總是，眼前閣有蓋濟比咱卡譀古[hàm-kóo]、卡出名，閣有錢有勢个痟儂，佇遐排列等欲上電視，扑算輪袂到著我。
許信良講台灣著愛大膽西進，嘛開放予中資、中客、中生來台灣，但是政治上閣愛想盡辦法拖落去，勿[mài]佮中國談判。這用跤頭趺想嘛知，根本無可能！
施明德公開唱聲[tshiàng-siann]，叫蔡英文公開表明家治是毋是同性戀。一个男女關係濫糝來个儂，將下流當做風流，亦敢對一个獨身過日、行為端正个儂講出即款話來侵犯儂个隱私？有夠橫逆[hîng-gi̍k]！
台灣儂著是有真濟即種敗類，外來政權才敢按呢聳鬚[tshàng-tshiu]。這毋是「歹年冬，厚痟儂」會凍形容个，著愛用老輩儂捷講个一句古文來表達：「國之將滅，必有妖孽」[Kok# tsi tsiong bia̍t, pit-iú iau-gia̍t.]
Comments powered by Disqus.