四月十三烏色禮拜五，嘛是舊曆三月二三媽祖生。迄工暗時，台灣本土文化書局台文分享會欲煞鼓个時，三箍大武儂傱[tsông]入來，一个講欲買有台灣特色个紙牌仔。怹身軀攏有臭薰羶[tshàu-hun-hiàn]，有一个，頂面衫 lik--起來，獻出大腹肚桶，無偌久，衫愈 lik 愈峘，連奶仔嘛予伊出來看儂。怹講中國腔个北仔話，有一个閩南語真pênn-pāng，敢[kánn]是廈門个？
我請簡先生、林老師留落來，共冊店余小姐助膽、鬥顧，我送曾小姐先走。
台灣个大街小巷，會puh出遮濟虎熊豹彪[hóo-hîm pà-piu]，無規無矩無教養个儂，咁毋是迄个好頭媠面个馬先生，喙笑目笑開大門去迎接入來个？
馬先生个fans啊，請恁毋通驚惶[kiann-hiânn]，著愛佮馬區長仝款，歡歡喜喜來款待平平攏是炎黃子孫个大陸同胞哦！
我從來毋捌親像最近幾個月按呢，遐爾煩惱台灣个運命。目睭金金看台灣予即種儂吞食去，做即種儂个奴才。
因為知影煩惱受氣會損身體，氣死驗無傷，只好激[kik]予麻痺麻痺，無愛看、無愛想，但是按呢又閣有罪惡感，凡勢會變做陰症[im-tsìng]（類似憂鬱症[iu-ut-tsìng]）。
我最近已經無啥氣力，閣綴冊店个朋友去看台中古厝按怎予高級土匪損斷[sńg-tn̄g]、草踏[tsháu-ta̍h]。
註：標題寫「大陸客」特別加引號，是學台灣媒體佮統派政治仔个講法。地球毋是干焦中國大陸才是大陸，中國客就是中國客，請勿[mài]閣叫怹「大陸客、陸客」！儂美洲大陸、歐洲大陸、澳洲大陸來个觀光客，咁會按呢？
Comments powered by Disqus.