毋是任何【遺體】攏通叫做【大體】

最近台灣个華語文使用者有一款新風氣，真愛將任何〔遺體〕攏稱呼做〔大體〕。在我看，按呢毋好。〔大體〕是醫學教育个專門術語，用來尊稱捐予醫學院个身屍[sin-si]，欲做解剖[kái-phóo]教學个路用。其他个語文應用，無應該將遺體[uî-thé]一律叫做大體[tāi-thé]。

在一般用途个中文，「大體」本來已經有幾種意思，教育部重編國語辭典網路版有收：
一、大略、概要
二、大約、大致
三、心
四、整個局面

伊並無將醫學術語所講个「大體」收入去，若是社會開始普遍將遺體叫做大體，將來教育部也著加收即種定義。總--是，奉勸逐家毋通趁即種風氣，請尊重醫界个專業用語，毋好提「大體」來凊彩講。一旦社會將伊變做遺體个通稱，就枉費醫界特別設即个詞，來崇敬大體捐贈者个用心。

教育部辭典閣收幾若个包含「大體」兩字个語詞，像「大體上、識大體、大體而言、不知大體、不識大體、不存大體」，這攏佮遺體無底代[bô tī-tāi]。