毋(m7)

我佇Taokara个網誌有留一段話：「我讀著个日本時代个台語文獻，無論是台灣儂或是日本儂寫个，所用个文法攏佮我个語感有增差。在我想，詞義系統比較閣算卡簡單，若是語法系統，he閣愈oh pa-lē。」Pa-lē是耐心處理个意思，照《陳修典》个解說，本義是挽毛箭[mô-tsìnn]（水禽類換毛期个幼毛）。俗語講：thâi雞雞仔細，thâi鴨oh pa-lē。想卜thâi雞來請儂客，雞iáu閣細隻；若是卜thâi鴨，毛箭閣歹tshuah。即句話是無誠意个主儂講出來个藉詞[tsià-sû]。

台語个「毋(m̄)」，表示意願上个否定(hóo-tīng)。但是古早台語，「毋」定定用做單純个否定詞，相當文言个「不(put)」。「毋正經」毋是講毋肯正經，干那是「不正經」。可比「做毋正經个查某袂容允伊入門」（《新訂日台大辭典》p.121）。

北仔話【不大不小】，早个台語講「毋大毋細(m̄-tuā-m̄-sè)」。即馬罕得按呢講，只好講，袂傷大、袂傷細；無蓋大、無蓋細；普通个大細。「毋穩毋穩」（危險危險），換講「無穩無穩」；「毋妥當」，改講「無妥當」。「毋使驚(m̄-sái kiann)，講「免使驚」。「想毋伸[siūnn-m̄-tshun]」講「想袂曉」。

「毋」當做「不」个功能，目今大部份攏予「無」取代去。毋閣，「毋大毋細」，袂使講「無大無細」，he是別款意思。結果，「毋大毋細」个意思，煞講袂捷矣。