民主台灣應該全面移除威權象徵个孫文、蔣介石偶像

台南市長賴清德，欠缺轉型正義个理想精神，毋敢違逆[uî-ke̍h]外來威權勢力个意志，放據在湯德章記念公園內底个孫文銅像，繼續tshāi佇遐做神，用來堅固中華民國殖民統治个正當性。佳哉有建國志士蔡丁貴教授，招集友志，共銅像偃倒去。

孫中山个三民主義，理論本身也有研究價值，但是，予國民黨共伊畫烏漆白、改造成做聖旨，用來洗腦台灣人民，即款做法極其下梢[hā-sau]。

當年我考大學聯考，三民主義上下兩冊，連提起來看都懶，一字都無背，結果分數無到低標。若欲讀台大，干焦會得入哲學系，我毋是對哲學無興趣，但是驚予大儂嫌講讀哲學系無出路，結果我才去讀政大。

當年，我若乖乖仔背三民主義，今仔日毋知我會按怎？

黨國教育對咱台灣儂个影響，一代過一代，雖然情形無啥仝，總--是，無論是會適應、袂適應个儂；抑是講順從伊、反抗伊个儂，攏著了足大个氣力，才有法度將伊个傷害，轉化做正面个力量，來面對家己、面對台灣。