氣候轉變轉溼熱

氣候轉變轉溼熱 [khì-hāu# tsuán-piàn# tńg sip-jua̍h]
蚊蟲出岫大虼蚻 [báng-thâng# tshut-siū# tuā ka-tsua̍h]
趖來趖去欲來倚 [sô-lâi sô-khì# beh lâi uá]
勼跤讓伊去生活 [kiu-kha# niū i khì senn-ua̍h]

講著虼蚻眾儂驚 [kóng tio̍h ka-tsua̍h tsìng-lâng kiann]
相報經驗分阮聽 [sio-pò king-giām pun guán thiann]
虼蚻算來上歹命 [ka-tsua̍h sǹg--lâi siōng pháinn miā]
hông嫌thái-ko第一名 [hông hiâm thái-ko tē-it-miâ]

蹛佇灶跤便所角 [tuà tī tsàu-kha piān-sóo-kak]
專門抾儂擲㧒捔 [tsuan-bûn khioh lâng tàn-hak-ka̍k]
若hông看著隨刣捒 [nā hông khuànn--tio̍h suî thâi-sak]
掠入馬桶tshiâng落礐 [lia̍h ji̍p bé-tháng tshiâng lo̍h ha̍k]