泡茶機

有一个愛跁山个好儂，為著卜予咱儂卡康健，設計出一種不止仔利便个機器，獻予眾儂來做泡燒茶、thiānn身命个路用。逐个卜愛，攏 thìng 好去共 moh 一台仔轉去家治泡。阿本=也[a] 嘛有去共討一台。用 tio̍h 有影袂 bái，總算毋免閣用烘爐起火，薰甲歸厝間矣。儂儂攏共呵咾感謝。

即台泡茶機，有寡功能，阿本=也到 tann 攏 iá未試過。定定愛用著个功能，用一站仔過，開始發見有破扑 [phuà-phah]。伊个茶葉槽仔看 tio̍h to 真大 kha，毋閣若 me 卡儕茶葉落去，機器著會 ònn.. ònn.. ònn.. 一直絞，加足久足久个時間 tsiah 泡會好勢。閣再有時仔泡出來个茶水，茶色略仔各[koh]樣各樣。

阿本=也加減有淡薄仔機械常識，伊共即台泡茶機前後巡一下，想卜將外殼掀起來，看內底是叨位仔設計了 tîng-tânn，煞扑袂開，有一粒暗鎖扣咧。

阿本敲電話去請教目今 tng tshìng，一个專門塊解答儂問題个牛博士。牛博士想--一下，共阿本報路。順迄條路落去，阿本=也真緊就揣著一支塊開即款暗鎖个天下通 [thian-hā-thong] 矣。

當阿本=也轉來到厝裡，踞佇泡茶機个後壁，正手挓天下通，倒手卜伸出去摸迄粒暗鎖个時陣。煞予想著講，按呢咁袂做失德，對儂袂得過？

阿本=也將天下通 tàn 邊=也，坐落來想予卡真。伊儂真 pì-sù，雖然佮泡茶機个設計者有熟視，嘛歹勢去共儂 tsak-tsō。就按呢，伊決心卜家治重頭設計一台卡簡單个泡茶機，thang 泡另外一種平平是台灣茶，毋閣品種無啥共个茶葉。迄寡茶葉，儂 to 亦已經做好佇咧，無共利用真扑損。Tann 儂健康專家有推薦 [tshui-tsiàn] 一款卡新个，茶心茶應該愛有个滋味佮成分，舊底个茶葉袂使閣直接挓來泡，愛用機器小可仔再製過。Iah 即種機器，就是阿本=也目前 [ba̍k-tsîng] 卜設計个物件。

阿本有揣著一款小 moh-tah，伊塊臆，舊底个泡茶機，kánn 是無加[ke]鬥即種 moh-tah，毋 tsiah 會遐慢。總是，愛歸台做出來，試看 tsiah 知。

阿本=也按算將伊即台新泡茶機个設計圖公開，望[bāng]卜佮逐家智識相交換，thang 予咱有閣卡好个設備來製造閣卡好个康健食食 [khong-kiān tsia̍h-si̍t]。