邱文錫[Khu Bûn-sik]先生咧佮李勤岸教授合作，欲將唸歌大師楊秀卿女士个作品，整理做 Flash 上網放送、配合動態字幕，予儂哪聽歌仔，哪學台語漢字佮音標。
邱先生佇台語文界，扑拚幾十冬喇，伊長期以來，一直有一个卡無合主流个理想，伊感覺羅馬字式[sit]个台語音標，社會个接受度有卡kē，若是用注音符號式个台語音標來標台語漢字，一般儂一下看，著唸會出八九成个台語音。伊並無拘執[khu-tsip]家治个想法，堅持干焦使用孤即項台語注音，伊出版个台語冊，亦有用羅馬字、亦有漢字，閣佇漢字个邊--仔，加上注音符號，按呢多元化來表記台語。
咱thang知，迄套注音符號系統，並毋是邱先生个自己流[tsū-kí-liû]，彼是教育部民國四十三年公佈个台語注音符號（照華語个注音符號去做調整增補）。當然，後來國民黨政策轉變，用 khu̍t-thâu-pōo 欲消滅台灣語言佮文化，即套著予政府tàn-hìnn-sak矣。毋過，台語學界个老前輩，吳守禮教授，一生攏繼續咧使用即套系統（參考 http://olddoc.tmu.edu.tw/chiaushin/Tai-PA-1.htm）。後來亦有別儂設計過類似个系統，親像名作家楊青矗 [Iûnn Tshing-tshiok]先生，閣有民間人士家治創造--个幾若套。
1999年 Unicode 3.0 有將即套台語注音符號，超出華語个部份收入去，佇 Bopomofo Extended，對 U+31A0 到 U+31B7 个編碼範圍內，表[pió]佇遮：http://unicode.org/charts/PDF/U31A0.pdf 從中，我發見幾若點問題，包括：
一、ㆧ (oonn) 个字體佮 ㆦ (oo) 配合了無好，下倒爿迄个大大个彎勾無應該是圓lìn-lìn个形，愛像 ㆦ 有彎角才著，這佮各位慣勢看著个華語注音符號 ㄛ(o) 無共款。雖然 Unicode 所定義个，毋是 glyph，是卡抽象个 character，但是伊个參考文件按呢創，致到[tì-kàu]一寡大廠，Adobe、Microsoft、文鼎 等等，攏綴伊錯--去。
二、入聲韻尾 -p/-t/-k/-h 本底應該是細字个ㄅㄉㄍㄏ，伊創做 ㆴㆵㆶㆷ，第三个毋著去，毋是ㄎ，是ㄍ才著。
三、第三、七、八聲个聲調符號無設（第二、第五會使提華語个來用無差。）
即點我後來才發現，這毋是Unicode台語注音符號个問題，Unicode 佇 bopomofo 迄區，連華語嘛無專用个聲調符號，著愛借用 spacing modifier letters (U+0300開始）个符號來用。但是台語第八聲个注音調號，雖然只是一个圓點，但是若欲佮韻尾配搭會好勢，排版恐驚足硬斗，實在不如另外申請四个掛入聲韻尾个第八調。
（以上即三點，讀者通將 Unicode 个表提來佮頂面講起吳守禮教授个網頁所列--个做比較。http://olddoc.tmu.edu.tw/chiaushin/Tai-PA-1.htm ）
四、恐驚伊無規定講，按怎將遮个符號合做一个完整个聲韻調組合，即點我愛閣揣看覓。(Unicode 个術語通稱做 extended grapheme cluster）
……等等个問題。
即馬閣轉來講邱文錫先生个代誌。伊堅定伊个理想，欲佇楊秀卿女士唸歌个歌詞，顯示一排羅馬字，一排漢字，每一个漢字邊--仔攏有台語注音符號。因為佇 Unicode 猶未出現以前，伊著咧出版即種台語冊矣，伊老早有用造字軟體，家治一字仔一字，造出兩千个台語注音組合。但是即馬是網路時代，資料欲上網予儂用瀏覽器去看，任何儂若無安裝伊个造字檔，著看袂著遮个符號。
Microsoft Windows 每一版攏有佮「TrueType造字程式」予儂用（佇附屬應用程式內底），除了會使家治造字，亦通提別儂造好个 .tte 造字檔，佇即个程式內底，做一个連結字型个動作，著通將造字檔連結來家治電腦本底有个字型，按呢才看會著額外个造字。
總是，這需要幾若步个動作，佮一寡耐心：下載 .tte 造字檔，家治去執行「TrueType造字程式，然後點遮、選遐、有个無个……。邱先生真清楚一般儂袂愛了即種精神，所以想欲將即个造字檔包裝做一个安裝程式來予使用者簡單著裝好勢。
伊連絡著幾若位亦捌台語亦捌電腦个儂，拜託怹。種種因素，煞無儂會凍鬥相共。走揣兩三個月久，後來，揣著我。一--來，我對伊个理念，並無排斥[pâi-thik]；二--來，我對即種技術，亦有興趣想欲了解，著先答應伊欲研究看覓才共講。
佳哉，上網揣著資料，看起來原則上無偌困難。實作[si̍t-tsok](implement)--落去，拄著一寡難關，亦一步一步順利克服。一个週末[tsiu-bua̍t]，兩暝後，我著將成果交出來矣，伊真滿意，亦真驚喜。
即个字型，另外閣有造一寡台語漢字，親像「媠、䆀、𨑨、迌」[suí, bái, tshit, thô] 遮个，我即馬攏用 Unicode 矣。但是邱先生猶原繼續用 Big5 編碼个造字區來造字。這亦姑不將，對伊來講，台語漢字閣是小可代，台語注音才是大麻煩，抑 Unicode 台語注音閣有頂面所講遐濟問題，十年來無儂tshap。官方去共 Unicode 組織申請，通過了後，著毋捌閣去請求修改。邱先生即套唸歌系統做出來，阮用 Mac 个，抑是 Linux 个，攏看袂著注音符號个部份。毋過無要緊，橫直伊嘛有創台羅佇咧。
台文志士下苦心 [ Tâi-bûn tsì-sū hē khóo-sim ]
人海茫茫少知音 [ Jîn-hái bông-bông tsió ti-im ]
隨儂出力無要緊 [ Suî-lâng tshut-la̍t bô iàu-kín ]
歌仔罔唸詩罔吟 [ Kua-á bóng liām si bóng gîm ]
Comments powered by Disqus.