洪秀柱「一犬吠影，百犬吠聲」比喻無妥當

最近洪秀柱佇伊个面冊寫講：

『但令人遺憾的，我被問到一百遍的問題，竟然是「換柱」。

台灣是個不缺謠言的社會，一個人製造謠言，一群人傳播謠言，於是三人成虎，「一犬吠影，百犬吠聲」。』

伊括號內个話，是流傳真久个漢語俗諺，佇章回小說看會著、梁啟超个文章也有，毋但按呢，古早个台語儂也有咧講，台日大辭典就有收（上冊p.88)，是用文言音唸做：「一犬吠形，百犬吠聲。」(it khián huī hîng, pik khián huī sing)，韻跤是 ing 韻。

蕭平治老師《台灣俗語鹹酸甜》唸做：一犬吠影，百犬吠聲。(it khián puī iánn, pah khián puī siann)，韻跤是 iann。

《昔時賢文》：「一人傳虛，百人傳實」(it jîn thuân hi, pik jîn thuân si̍t)

咱儂話个俗語是：「講一个影，生一个囝。」 (kóng tsi̍t ê iánn, senn tsi̍t ê kiánn)，毋但意思媠氣[suí-khuì]，押韻也完美。

洪秀柱個性真強，面對社會上「換柱」个風聲，伊出來反駁，用著「一犬吠影，百犬吠聲」按呢个話，等一是將社會上千千萬萬咧會[huē]講伊可能會退選个儂 攏比喻做狗，實在歹聲嗽，莫怪鄉親感覺伊即个儂「刺夯夯」[tshì-giâ-giâ]。

用動物个行為反應，來比喻人事个諺語真濟，「一犬吠影，百犬吠聲」即句古諺也是真有觀察力，比喻了真精妙个修辭法，總--是，洪秀柱身為一个候選人，面對黨內外佮社會各界「換柱」个議論，伊若正實有心欲爭取選民个認同佮選票，就無應該按呢講來得罪眾儂。

洪秀柱台語毋是真𠢕[gâu]？伊若會曉佇即陣出來講，「拜託鄉親序大毋通聽別儂咧風聲謗影[hong-siann-pòng-iánn]，伊講一个影，咱煞生一个囝。」按呢毋但心意有表達出來，也加真雅氣[ngá-khì]。

可惜，我看伊是袂曉即種級數个台語，也無按呢个心。

唸華語个文言俗語，也無影就比台語白話俗語較斯文。